Asuntu ne'e, xefe governu dehan, membru governu no instituisaun ne'ebé halo kontrolu, kontinua akompaña hodi hadi'ak liután iha futuru.
"Ha'u mós haree no rona, komunidade sira manifesta, mais ha'u hanoin Ministériu sira ne'ebé toma konta ba atividade ida ne'e, kada loron sira iha terenu, sira sei haree saida mak bele hadi'a," dehan PM Taur iha Palásiu Prezidensiál bairru-pite, hafoin enkontru semanál ho PR Lú Olo, Kinta (26/11).
PM afirma, esperiénsia foun ne'ebé foin hahú, ne'ebé implementa iha tempu naruk, ne'ebé la'ós membru governu de'it mak involve.
"La'ós membru governu de'it, maibé involve mós husi ajensia no emprezáriu sira, ne'ebé ajuda fahe produtu sira ne'e. Entaun governu iha nosaun ida ne'e para hadi'a liután, depois enkoraza mós instituisaun sira ne'ebé halo kontrolu, para kontrola maka'as liután," dehan Nia.
Xefe governu ne'e akresenta, PDHJ, KAK, inspetoria jerál no instituisaun sira seluk ne'ebé hotu-hotu ko'alia, entaun ho hanoin ida katak se ita hadi'a di'ak liu, maka sei halo ema hotu kontente.
Entretantu, programa sesta bázika ne'e governu liuhusi ministériu relevante sira hahú lansa ona iha munisípiu sira, ne'ebé kada loron membru governu besik na'in 10 mak ba halo lansamentu ba programa sesta bázika ne'e iha suku ida no produtu sira ne'ebé governh uza iha programa sesta bázika hodi rekopera ba ekonómia povu nian mak hanesan, fos, mina bimoli, manu-tolun, foremungu, koto, masin, rinso, pasta dente no seluk tan.(*)