Provedora Jesuina Maria Ferreira Gomes hateten katak, atuasaun membru PNTL iha Lakluta ne'e la tuir ona dekretu lei númeru 44/2011 kona-ba rejime jurídiku uza forsa.

"PDHJ halo ona monitorizasaun liuhusi delegasaun teritoriál iha Baukau , rekolla ona informasaun no dadus husi autoriedade lokál iha Lakluta no prepara ona relatóriu no PDHJ agora prepara hela kronolójia para halo notísia de krime ba Ministériu Públiku (MP) no foti inisiativa hodi loke investigasaun ba atuasaun PNTL, tanba atuasaun PNTL nian la tuir regras, hodi forsa esesivu ne'ebé la tuir dekretu lei 44/2011 kona-ba rejime jurídiku uza forsa," Provedora Jesuina hateten ba jornalista, Kinta (3/12).

Nia dehan, atuasaun membru PNTL sira tenke uza prinisípiu proporsionál no nesesáriu, saida mak akontese, saida mak atu halo no oinsa mak uza forsa.

"Maibé ita haree liuhusi média ne'ebé fó sai laiha ameasa ida ba membru PNTL, maibé sira nia asaun ne'e uza forsa ne'ebé esesivu hanesan tebe, tuku, tanba ne'e mak PDHJ sei foti inisiativa para halo investigasaun ba atuasaun ne'e," nia dehan.

Atuasaun membru PNTL iha Lakluta ne'e iha violasaun direitu umanu liu-liu liga ba direitu ba liberdade, seguransa no integridade, tanba halo agresaun fíziku, uza forsa esesiva ne'ebé la tuir lei.

"Maske ita-nia komunidade ne'e halo krime, prosesu tuir krime, tuir dalan legál, labele labele uza forsa esesivu hodi halo atuasaun ba ita-nia komunidade sira," nia dehan.

Entretantu PDHJ nia knaar importante tolu ne'ebé nia tenke halo mak promosaun, edukasaun liuhusi formasaun ba membru PNTL sira no servisu monitorizasaun para tau matan ba intervesaun ka atuasaun membru PNTL no ida ikus lku mak halo prosesu investigasaun no violasaun sira ne'ebé membru sir halo.(*)