Koordenadór KIDA Agostinho Grigório Ramos, bainhira orsamentu ne'e mak hetan promulasaun husi Prezidente Repúblika (PR) Francisco Guterres Lú Olo, governu presiza uza ho didi'ak nune'e bele halo dezenvolvimentu ba povu no nasaun Timor-Leste.
“Mekanizmu atu ezekuta orsamentu nafatin iha governu tenke aloka no jere didi'ak atu nune'e ninia benefisia ne'e ba povu no rai ida ne'e ho di'ak,” Agostinho hateten iha Palasiu Prezidensiál Bairu-pite, Segunda (14/12).
Nia dehan, orsamentu Jerál Estadu (OJE) nu'udar raan ba povu no nasaun, tanba ne'e presiza ezekuta ho di'ak.
"Tenke la'o ba oin tanba ida ne'e maka garante dezenvolvimentu estadu nasaun ida ne'e ninia, orsamentu tenke ba oin, soberania hotu-hotu tenke konserta, mezmu polítiku no situasaun bele diferente maibé orsamentu estadu nu'udar garantia, raan no mós nu'udar iis ba rai no estadu ida ne'e tenke ba oin," Agostinho afirma.
Entretantu proposta orsamentu 2021 nian ne'ebé governu submete ba iha Parlamentu Nasionál (PN) iha 15 Outubru hamutuk billaun $1.895 hetan ona aprovasaun iha PN iha Sábadu (12/12) ho totál vota a favór 44 kontra no abstensaun zero.(*)
