Deskordánsia ne'e hahú mosu tanba nia hare katak, Ro haksolok ne'ebe Timor-Leste propoin ida ne'e nia presu hamutuk millaun $16, maibé la'ós millaun $30.
Tanba ne'e, Daniel sujere diak liu Komisaun Anti Korrupsaun no Ministeriu Publiku atu loke prosesu investigasaun ne'ebé sériu, nune'e la merese atu estadu lakon tan osan millaun $14 ba ida ne'e.
Nia preokupa tanba, bainhira estadu mak tau tan osan millaun $14 hodi aloka ba finalizasaun ro haksolok mak Timor-Leste sei gasta ninia orsamentu hamutuk millaun $30 ba ro ida deit.
"Totál orsamentu iha autoridade RAEOA nia proposta hodi aumenta tan millaun $14 ba Ro haksolok, prontu razaun sosiedade sivil nian simples, ita aloka tiha kuaze millaun $16, ba konstrusaun ro haksolok, depois la mai, no loloos ida ne'e ona iha prosesu investigasaun, tanba ida ne'e kategoria ona ba buat ida dehan ieresponsabilidade," Daniel hateten ba www.tempotimor.com iha nia servisu fatin Caicoli, Dili, Kuarta (16/12).
Nia hatutan, uluk kedas FONGTIL sujere ba Komisaun Anti Korrupsaun, no Ministeriu Publiku atu loke ona investigasaun, agora se buat ida iha ona prosesu atu loke investigasaun hodi hare tanba sa mak la mai, agora hakarak ba tau tan osan, ida ne'e ba FONGTIL laiha razaun atu tau osan ba ida ne'e.
Nia parte lamenta ho kazu ro haksolok ne'ebe dala ruma governante sira no mos Parlamentu Nasional deklara dehan ne'e Problema estadu, ne'ebe tenke responsabilidade estadu nian, maibe sosiedade sivil hare katak ida ne'e la'os fo ba estadu mak responsabiliza.
"tanba ne'e ita sujere atu loke investigasaun ba autor sira ne'ebe involve iha prosesu, halo tenderizasaun depois to'o ikus fo ba kompañia ida manan ne'e la'os fali dehan ida ne'e responsabilidade estadu," nia kestiona.(*)