Iha selebrasaun festa natal 2020 no tinan foun 2021 ne'e, Prezidente partidu CNRT Xanana Gusmão so’e lia katak, se mak sente sala bele forma hodi halo konfesa.
"Amu atu besik mai ona, ne'ebé se mak sente sala iha nia fuan, iha nia isin karik forma ona para amu mai karik konfesa," Xanana dehan ba militante sira ne'ebé tuur iha kadeira, Sesta 18/12).
Lider karismátiku ne’e mós ko’alia ho hamnasa katak, atu sai amu bispu la presiza liuhusi kardiál, tanba iha ne'e kardiál Ramos Horta mós iha.
Hafoin liu minutu balun, bainhira Amu Angelo Salsinha to'o iha fatin, Xanana dehan hikas, feto sira ne'ebé atu konfesa bele mai ona.
"Konfesa agora ne'e tranparénsia eh, tenke uza mikrofone," Xanana ko’alia ho hamnasa.
Entretantu observasaun www.tempotimor.com nian iha terenu nota katak, partisipa iha festa natal no tinan foun ne'e mak hanesan eis Prezidente Autoriedade Rejiaun Administrativa Espesiál Oekusse Ambeno (PA-RAEOA) José Luis Guterres "Lugu" inklui estrutura Komisaun Polítika Nasionál (CPN) CNRT, membru Parlamentu Nasionál (PN) inklui eis membru governu no militante sira.(*)