Ministru Prezidénsia Konsellu Ministru Fidelis Leite Magalhães informa, Konsellu Ministru aprova ona projetu rezolusaun ida ne'ebé impoin serka sanitária ida iha Rejiaun Administrativa Espesiál Oekusi Ambenu (RAEOA).

"Ho ida ne'e katak, to'o dia 2 de janeiru fronteira sira ne'ebé liga RAEOA ho Indonézia sei taka hotu, postu fronteira sira taka hotu. Alende ida ne'e mós sei bandu para laiha dezlokasaun husi Oekusi ba Munisipiu sira seluk liu-husi rai maran, tasi no lalehan. Entaun, husi agora to'o dia 2 de janeiru iha Oekusi sira ne'ebé mak iha Oekusi atu hela metin labele halo viajen mai iha munisipiu sira seluk no mai Dili, sira hela lai iha ne’eba", Fidelis hateten lia hirak ne’e hafoin reuniaun Konsellu Ministru iha palasiu governu, Tersa (29/12).

Nia dehan, aplika ida ne'e, tanba númeru infetadu iha Oekusi mós aumenta no ida ne'e mós atu loke dalan fasilita Ministeriu Saúde atu kontrola diak liu tan moras ne'e nia hada'et.

"Governu aprova rezolusaun ida ne'ebe impoin pontu rua, pontu ida taka hotu postu fronteira sira entre Oekusi ho Indonézia, pontu ida fali atu bandu lai temporariamente dezlokasaun sidadaun sira nian husi Oekusi mai iha Munisipiu sira seluk nomós husi Munisipiu sira seluk ba Oekusi, ne'e sei aplikavel to'o dia 2 de janeiru", nia tenik.

Nia hatutan, liu tiha loron 2 janeiru tinan 2021 medidas Estadu Emerjensia foun tama mak governu desidi halo fali rezolusaun foun ida.

"Mais pur enkuantu imperativu katak, importante tebes ita iha regra ida ne'e atu kontrola moras ne'e labele hada'et ho lalais husi fronteira mai munisipiu sira seluk nomos munisipiu sira seluk ba iha RAEOA", nia dehan.
Entretantu, governu aprova projetu rezolusaun ketak ba Oekusi tanba nia estatutu RAEOA. (*)