Ministru Administrasaun Estatál (MAE), Miguel Pereira de Carvalho informa, internet daudaun ba MAE funsiona normal, tanba fornese fali husi Timor Telecom.

"MAE nia internet ne'ebe mak asina ho kompania elit komputer, asina tiha depois de semana ida kazu ne'e mosu, depois de mosu ha’u kansela kedan. Ne'ebé, ohin loron Ministeriu laiha ona relasaun ho kompania ne'e", Miguel hateten lia hirak ne’e, hafoin reuniaun Konsellu Ministru iha palasiu governu, Kuarta (06/01).

Nia dehan, Ministeriu Administrasaun Estatál daudaun estende kontratu ho kompania ne'ebe fornese fali internet hafoin mosu ilegal ne'e.

"Ministeriu estende kontratu ho ida ne'ebe mak uluk asina ona kontratu ho Ministeriu Administrasaun Estatál, ne'ebe la halo ona kontratu ho kompania elite komputer", nia dehan.
Kona-ba orsamentu kontratu Ministru lakohi atu siik numeru, tanba ne’e kontratu halo espesifiku.

Nia mos akresenta, kontratu ne'e bai-bain iha periodu, maibe tanba kontratu hotu-hotu remata ona iha fulan dezembru tinan 2020, agora tama ona iha tinan 2021 ho orsamentu foun, entaun tenke halo fali tender foun nune’e hetan kompania foun atu hala'o servisu sira iha ministeriu inklui mos internet. (*)