José Reis esplika governu iha fim do ano 2020 foti desizaun salva povu husi propagasaun surtu Covid-19 hanesan parte kontinuasaun inísiu estadu emerjénsia até agora.
"Atu hatete de'it katak laiha ida ke iha intensaun aat no politiza situasaun Covid-19," dehan José iha Parlamentu Nasional (PN), Tersa (12/01).
Governante ne'e hateten inisiu fulan dezembru 2020 mundu tomak hasoru hikas virus ne'ebé hanaran SARS-2 (Covid-19) ne'ebé sai ameasa ba ema hotu inklui virus ne'e nia hada'et makas no lalais tebes.
José akresenta iha Timor-Leste sistema saúde ne'ebé sei frazil obriga governu atu adopta estratéjia sira hodi minimiza entrada virus iha Rai-laran.
"Governu iha prekupasaun boot atu buka kedas solusaun emidiatu hodi bele responde no prevene situasaun ida-ne'e," dehan Reis.
Iha fatin hanesan, Vise-Xefe Bankada CNRT, Deputadu Patrocínio Fernandes dos Reis, hateten hafoin dekretu governu númeru 21/2020 ne'ebé fó-sai iha dezembru 2020 relasiona ho estadu emerjénsia ba IX kuaze aktividade tomak inklui igreja hapara totalmente maibe membru governu sira kontinua halo atividade hanesan babain.
"Dekretu lei ne'ebé ko'alia kona-ba labele halibur ema liu na'in 10 maibé membru governu sira rasik ba halibur ema liuhusi atus ba leten hodi halo atividade sira ne'ebé mak ita haree la kondiz ona ho dekretu lei ne'e rasik," dehan Patrocínio.
Patrocínio hatete bankada CNRT prekupa no presiza tebes esplikasaun husi governu nune'e publiku bele hatene katak situasaun covid-19 sériu duni.(*)