Diretór ezekutivu Fundasaun Mahein (FM), Joăo Almeida haree katak durante ne'e estadu hanesan abandona ninia sidadaun sira iha rai liur, tanba iha sidadaun balun mak ezíje atu fila, maibé sira rasik laiha meius, maske konstiuisaun RDTL garante katak, sidadaun iha ne'ebé de'it, iha direitu fundamentál atu hetan protesaun husi estadu.

Nia fó ezemplu hanesan kazu husi estudante sira iha nasaun Izrael ne'ebé sira ezíje atu fila, maibé laiha meius, no aat liu tan dook husi territóriu TL.

Nia hatutan, sidadaun sira ne'ebé besik iha territóriu hanesan kazu TL nian ho Indonezia liu-liu timoroan sira ne’ebé estuda iha Osidentál, Java, Sulawesi, sira hakarak fila, mais sira laiha meius.

Situasaun ida ne'e, obriga sidadaun sira hili meius ida ne'ebé sira bele uza hodi mai TL liuhusi Timor Osidentál no hakat ilegál.

Nia dehan, nia la'os aseita ho hakat ilegál mai área TL, maibe tanba liga ho prevensaun Covid-19, nune'e dalan úniku ne'ebé sira uza mak tama husi dalan ilegál.

"Tanba ne'e dala-ruma sé ita kriminaliza, ha'u hanoin katak ne'e laloos karik. Tanba, estadu tenke proteze sira, tanba ema nia rain sente ameasadu, mais ita la halo protesaun ba sira", Joăo Almeida, hatten iha nia kna'ar-fatin Fomentu, tersa (19/01).

Tuir nia, estadu tenke hola medida ida ne'ebé bele proteze sidadaun sira iha rai liur, tanba ida ne'e direitu ida, maibé bainhira laiha atensaun ruma husi estadu, sira sente la seguru, meius saida de'it mak sira bele uza atu bele tama iha ita nia rain, inklui tama ilegál.

"ita la aseita tama ilegál, mais dala-ruma sira sente ameasadu, sira uza meius ida ne'e, sira konsiente katak ne'e sala. Iha situasaun normál, sá tan iha situasaun ida krize hanesan Covid-19 ne'e", nia dehan.

Nia fó hanoin katak, meius neebé TL halo hodi proteze sidadaun sira, ida maka bele halo evakuasaun ba sira, ka bele mantein kontatu ho sira no oinsá bele garante sira nia kondisaun iha ne'ebá moris seguru liu, mais ida ne'e estadu la halo.

"Tanba ne'e ha'u hanoin katak, kriminaliza sira ne'e ladun loos, bainhira ita la hola uluk medida sira protesaun atu proteze sira i ita nia embaixada sira komunika ho sira di'ak", nia tenik.

Maske nune'e, nia dehan, buat ne'ebé nia nota husi sidadaun timoroan sira mak, buka koopera hodi entrega aan ba polísia no kumpri Kuarantena durante loron sanulu-resin-haat. (*)