Liga ba opsaun polítika ne'ebé aprezenta husi MAE ne'e hetan apresiasaun husu Konsellu Ministru (KM) katak iha duni nesesidade atu transforma postu-administrativu Atauru ba Munisipiu. Maibé, tenke iha proposta alterasaun husi governu ba iha Parlamentu Nasionál (PN) no ikus liu Prezidente Repúblika (PR) tenke promulga.
"Ko'alia ho Primeiru Ministru (PM) kona-ba preparativu sira atu bele garante katak, Atauru iha infrastrutura ne'ebé naton, para aban-bainrua bainhira estadu konsege transforma postu-administrativu Atauru ba iha Munisípiu espesiál ida, komesa rona ona asuntu ida ne'e mak ohin ko'alia infraestrutura sira bele preparadu ona," dehan Miguel Pereira de Carvalho hafoin remata audiénsia ho PM Taur Matan Ruak iha Palásiu Governu, Tersa (9/2).
Nia dehan, bainhira atu estabelese Munisipiu ida presiza tebes preparativus, liu-liu infraestrutura sira, nune'e bainhira podér lokál sira estabelese iha fatin hanesan Atauru iha ona fasilidade sufisiente.
"Kestaun ida ne'e foin mak deskuti iha Konsellu Ministru, opsaun polítika lezilativa Administrasaun Estátál hodi mai aprezenta ona ba KM iha semana balun ba kotuk," Nia informa
Nia mós dehan, kritéria hatur ona iha divizaun administrativa teritóriu, maibé ne'e aktu polítika ida ne'ebé PN mak kompeténsia par foti desizaun ba asuntu sira ne'e.
"Haree ita-nia konstituisaun RDTL preve katak, tenke iha tratamentu administrativu espesiál ba fatin rua, ida maka Oekusi nomos ida maka Atauru, purtantu ne'e previzaun de konstituisaun, purtatu kabe ba lezisladór sira para oinsa atu bele hatur iha forma legal atu tratamentu espesial sira hanesan ne'e," Nia esplika
MAE mós sei propoin ba entidades kompetente sira liu-liu ba KM no PN kona-ba Atauru nia estatu espesiál sira, tanba ne'e sei hatur iha proposta ne'ebé MAE sei aprezenta iha tempu tuir mai.
Governante ne'e akresenta, asuntu transformasaun postu-administrativu Atauru ba Munisípiu ne'e, bainhira hatur ona iha dokumentu legál mak bele detallu liu. Entaun hanesan dehan ona katak, kestaun tratamentu espesiál ba Munisipiu Atauru ne'e foin aprova iha opsaun polítika lezilativa, purtantu hatur ona iha dokumentu legal.(*)
