Tuir Segundu Komandante Operasaun Sala Situasaun Brigadéiru Jenerál João Miranda “Aluc Descartes” katak, ekipa husi SIJK hala’o sorumutu ho autoriedade munisípiu Covalima inklui liña ministeriál sira, atu halo kordenasaun para koloka Forsa Unidade Teritoriál iha fronteira entre TL ho Indonézia.
“Despaxu husi PM nian mak reativa fali Sala Situsaun no kria mós unidade teritoriais tolu ne’ebé mai husi munisípiu Covalima, Bobonaro no RAEOA, para antisipa movimentu ilegál iha fronteira, tanba husi dezembru 2020 mai ne’e, propagasaun moras Covid-19 aumenta maka’as iha nasaun viziñu Indonesia, liu-liu iha Atambua ho Malaka , ne’ebe fronteira ho Timor-Leste,” dehan Aluc Descartes, Kinta (11/2).
Nia afirma, kazu pozitivu aumenta maka’as, liu-liu sidadaun sira ne'ebé tama ilegál. Entaun sai preokupasaun boot no iha nesesidade hodi estabelese forsa unidade teritoriais, para ajuda postu tatíka sira iha terenu, nune’e asegura fronteira husi entreda ilegais sira.
“FUT nia misaun prinsiál mai apoia no ajuda ita-nia autoridade munisipál ho Polísia munsipál no postu tátiku sira ne’ebé kolokadu iha fronteira munisípiu Covalima, Bobonaru no RAEOA, para oinsa bele apoiu Ministériu Saúde (MS), kona-ba implementasaun prevensaun Covid-19 iha rai laran,” katak Nia.
Brigadeiru ne’e akresenta, seluk husi estabelesimentu FUT iha fronteira ne’e, ekipa SIJK mós haree ba fasilidade sira ne’ebé atu akomoda ba FUT sira.
Iha fatin hanesan Kapitaun Mar e Guerra, Pedro Klamar Fuik katak, husi reuniaun ne’e, atu husu autoriedade munisipál sira-nia disponibilidade hodi kontinua hala’o sosialisazun ba sidadaun sira ne’ebe hela besik fronteira, para sira bele intende no apoiu prevene propagasaun Covid-19.
Entretantu, ekipa nasionál SIJK ne’ebé ba hala’o reuniaun ho autoriedade munisipál Covalima inklui liña ministerial sira mak hanesan Segundu Komandante Operasaun Sala Situsaun Covid-19 Brigadeiru Jenerál João Mirando “Aluc Descartes”, kordenador Estado Maior (SS-SIJK) Kapitaun Mar e Guerra Pedro Klamar Fuik”, Xefe Estadu Maiór F-FDTL Koronél Calisto Santos “Coliati” no Komandante Operasionál ba intervensaun Bombeiru Paul Oliveira Maia.(*)
