Inspesaun Jerál Traballu (IJT), nu'udár instituisaun públiku governu nian neebé tutela ba iha Ministériu Koordenadór Asuntu Ekonómiku (MKAE), ho nia kna'ar mak atu halo fiskalizasaun ba implementasaun lei traballu ho ninia lejizlasaun komplementár sira seluk.
Kna'ar espesifiku haat ne'ebé IJT hala'o maka, kontrolu ba kondisaun traballu, prevensaun risku profisionál, emite vistu traballu no seguransa sosiál ba kontributivu.
Bazeia ba kna'ar ne'ebé sira iha, nune'e iha tinan 2020, IJT hala'o ona ninia atividade vizita inspesaun tuir meta anuál ne'ebé kada tinan tenke halo atividade vizita inspesaun hamutuk 1200.
Inspetór Jerál Traballu (IJT) Rofino Lopes dos Reis, informa durante sira halo vizita inspesaun, abranje ba totál traballadór hamutuk 18,590 mak servisu iha kompañia sira.
"Husi atividade vizita inspesaun sira-ne'e iha mós infrasaun ne'ebé ami deteta husi kompañia hamutuk 400-resin mak viola regra traballu ka komete infrasaun barak mak traballadór ne'ebé servisu, la uza ekipamentu própriu, nomoos problema iha kontratu," Inspetòr Jerál Trabllu (IJT) ne'e informa ba jornalista sira iha nia kna'ar-fatin, Hudilaran, segunda (15/02).
Nia hatutan, kompañia sira-neebé komete infrasaun, iha balu mak IJT aplika ona multa, maibé kompañia hamutuk 46 mak sira fó de'it autu-adverténsia ka xamada atensaun, tanba komete infrasaun ladún todan, no ingrasaun barak liu mai husi kompañia estranjeiru sira.
"Husi totál infrasaun hamutuk 400-resin ne'e, IJT hatama osan ba rihun $273,754 dollar amerikanu, ne'ebé fiksu ona ami selu ba iha kofre estadu", dehan nia.
Nia haktuir, dadus ne'ebé dadaun ne'e iha, IJT emite ona autorizasaun traballu, total 5,879, ne'ebé pedidu foun mai husi migrasaun hamutuk 2,199, no pedidu renovasaun hamutuk 3,682.
"Ha'u hanoin, ligasaun ho seguransa saùde traballu ne'e, dala barak ema la uza ekipamentu própriu para atu servisu", dehan nia.(*)