Xefe Reprezentativu JICA Timor-Leste, Goto Ko, informa, JICA Timor-Leste, lansa treinamentu online kona-bá dezenvolvimentu no manutensaun Aeroportu ba funsionáriu husi ANATL,E.Pobjetivu husi apoiu treinamentu ne’e atu eleva partisipante sira ninia kapasidade no koñesementu iha área Manutensaun no Dezenvolvimentu Aeroportu.

Antes ne’e, treinementu refere hala'o iha Indonesia liu-husi ita nia kooperasaun ho Ministériu Transporte Indonesia.

Funsionáriu ANATL sei aprende buat barak iha área Aeroportu nian husi peritu Ministeriu Transporte Indonesia, nune’e sira bele kontribui hodi dezenvolve área aeroportu nian iha Timor-Leste.

"Maibe, desde tinan ida ne’e, JICA labele haruka partisipante sira hodi ba tuir direta treinamentu refere iha Indonesia, tanba pandeima Covid-19. Ne’e duni ami realiza de'it liu-husi online no Ministériu Transporte Indonesia rasik mak sei fasilita treinamentu refere”,Xefe Reprezentativu JICA Timor-Leste, Goto Ko iha Hotel Golgota Komoro Dili, Segunda, (22/02/21).

Treinamentu ne’e foka liu-ba dezenvolvimentu infraestrutura Aeroportuariu ne’ebé sei realiza durante loron 4 nia laran hahú husi loron 22 to’o iha loron 26 Fevereiru tinan 2021, no ne’e hanesan kontinuasaun apoiu hosi JICA ba estadu Timor-Leste liuhosi programa Kooperasaun Tékniku/Technical Cooperation entre JICA Timor-Leste no ANATL, E.P.

Programa Kooperasaun Tékniku ne'ebé ho durasaun tinan rua ne’e implementa ona dezde tinan 2019, nune'e tuir planu sei realiza tan iha fulan marsu oin mai no sei foka mos ba área importante 3 seluk mak hanesan, Jestaun Finanseiru ba Aeroportu, Sistema Jestaun Seguransa no Jestaun Aeroportu, ho númeru partisipante hosi 12 to’o 15. (*)