Ohin, konferénsia líder bankada liuhusi reuniaun halo ona aprovasaun ajendamentu ba asuntu ida-ne'e.
Vise-Sekretáriu Meza Parlamentu Nasional, deputadu António Nobre Tilman hatete, reuniaun lider bankada deside aprova ajenda ne'e, tanba antes ne'e PN halo ona konfirmasaun ho deputadu Kalohan.
"Ajenda plenáriu ba aban nian, inklui mós ho levantamentu imunidade ba deputadu Kalohan. tanba antes ne'e nia parlamentu mós halo ona konfirmasaun," dehan nia iha parlamentu nasional segunda (15/3).
Antes ne'e, Xefe bankada Partidu Demokrátiku (PD), António da Conceição Kalohan, husu meza Prezidénsia Parlamentu Nasionál (PPN) no konferénsia líder bankada atu ajenda hodi hasai ona ninia imunidade, tanba nia parte prontu ona atu ba hatán iha Tribunál, nu’udar sidadaun ne’ebé iha responsabilidade ba Estadu.
Sekretáriu Jerál PD ne’e justifika, imunidade ne’e tuir loloos hasai ona iha fulan Dezembru tinan kotuk, maibé la konsege, tanba diskusaun Orsamentu Jerál Estadu tinan 2021 nian.
“Ha’u dehan karta ne’e mai tiha ona, Prezidente mós hatán, tuir loloos atu foti levantamentu imunidade ne’e iha Dezembru 2020 ne’e, maibe seidauk foti, la’ós tanba PN mak lakohi, maibé tanba debate OJE. Maibé agora ha’u ko’alia tiha ona ho PPN, atu loron 08 abríl ha’u ba, maibé atu ajenda ne’e tenke liuhosi konferénsia líder bankada sira. Ha’u rasik ohin husu ona ba Prezidente komisaun A, atu mós fó hanoin ba konferénsia, atu ha’u bele ba, tanba ha’u ema ne’ebé responsável ba vida nasaun nian, ha’u la’ós ema ne’ebé konvidadu mai iha ne’e, atu hases ha’u-nia qan hosi responsabilidade Estadu nian”,dehan nia.
Kazu ne’e akontese iha tinan 2014, wainhira deputadu kalohan sei asume responsabilidade nu’udar Ministru Komersiu, Industria no Ambiente .
Ministériu Públiku akuzq arguidu sira, ho krime pekulatu no krime partisipasaun ekonómia.(*)