Rekomendasaun ne'e hato'o husi Prezidente Bankada FRETILIN, Francisco Miranda Branco liuhusi komunikadu imprensa loron 25 fulan-marsu tinan 2021 ne’ebé www.tempotimor.com asesu husi Bankada Fretilin.

“Apela ba lideransa partidu CNRT, liuliu ba nia Prezidente no ex-Presidente Repúblika periudu 2002-2007 sr. José Alexandre Gusmão atu kontribui ho setór justisa, eduka no ko’alia ba nia kuadru partidu”, dehan nia.

Maibé, louva atitude deputadu bankada Partidu Demokrátiku, Antonio da Conceição ne’ebé ho konsiénsia tomak ba hamutuk ho deputadu na’in 56 ne’ebé konsege hasai imunidade iha plenária segunda loron 22 fulan-marsu hodi ba hatan iha tribunal nu’udar testamuña.

Ho konsiénsia ida ne'e, hatudu duni nia sentidu Estadu nu’udar servidór, no sai ezemplu mós ba partidu hothotu atu banati tuir, liliu partidu CNRT ne’ebé hari’i iha tinan 2007.

Maske, partidu CNRT iha tinan hirak liuba, ukun dékada ida resin, maibé ninia lideransa na'in-rua ona mak halai sés husi prosesu justisa, to’o ohin loron mós Ministériu Públiku la hatene sira-nia paradeiru.

Tanba ne'e, presiza banati tuir esperiensia Xefe Bankada no Prezidente Partidu Demokrátiku, atubele defende Lei, respeita ba justisa, defende no hametin Estadu ida ne'e. (*)