Ba asuntu ne'e, Taur husu ba deputadu sira iha Parlamentu Nasional atubele renova konfiansa, hodi autoriza deklarasaun EE ba da-XII nune'e permite governu hodi halo ezekusaun.

Rekomendasaun ne'e Primeiru Ministru hato’o, liuhusi deskusaun pedidu estesaun estadu emerjénsia ba dala XII iha plenária estra ordienariu iha PN, kuarta (31/03).

"Ha’u hakarak apela ba Exelénsia, Deputada no Deputadu sira, atubele renova konfiansa no apoiu ne’ebé hatudu ba Governu iha fulan hirak ikus ne’e, hodi autoriza ba renovasaun estadu emerjénsia ba da-12. husi Deklarasaun Estadu Emerjénsia, ba XII nu’udar instrumentu fundamentál no insubstituível ne’ebé permite ba ita atu prevene no kombate moras ida-ne’e ne’ebé iha poténsia boot ba mate”, hatete nia.

Durante deskusaun, PM Taur mos aprezenta dadus balun ne'ebe akontese iha tinan atus ida tolu liu ba, ne'ebe akontese pandemia gripe espanhola nian ne’ebé halo mundu tomak nakdoko, ne’ebé hamate ema millaun 50 liu iha Sékulu XX.

Maibe, umanidade hasoru fila-fali virus ida ne’ebé halo ema mate barak liután maka SARS-CoV-2, responsavel ba moras COVID-19, ne’ebé mak antes ne’e seidauk akontese, ne’ebé laiha tratamentu barak disponivel, virus ne’e hamate ona ema millaun rua, rihun atus ualu liu iha mundu tomak.

Kalamidade ne’e rasik belar ona iha mundu tomak, afeta ona ba ema barak, la iha destinsaun ba ema se de’it, liuliu, rasa, seksu, llíngua ka relijiaun, la’ós afeta de’it ba relasaun pesoál, família no relasaun sosiál nian sira, maibé mós fó impaktu boot ba nivel atividade ekonómika, kulturál no relijioza nasaun nian.

Ho ida ne'e, Impaktu hirak ne'e, la’ós buat normál iha Estadu Direitu Demokrátiku ida ne'e atu asiste ba aprovasun no ba renovasaun Estadu Emerjénsia ba períodu da-12, ne’ebé mak tutuir-malu de’it, ho medida restrisaun ba direitu no liberdade fundamentál nian sira ne’ebé justifika bazeia ba sirkuntánsia sira ne’ebé la prevee husi kalamidade públika no emerjénsia nasionál.

Felizmente iha luta ida ne'e, Timor-Leste la la’o mesak de'it iha luta ida ne’ebé mobiliza sosiedade, nasaun no mundu tomak. Maibé Ita kontinua konta ho apoiu tékniku, sientífiku, operasionál no finanseiru husi parseiru dezenvolvimentu públiku no privadu, nasionál no internasionál oioin, ne’ebé apoiu tebes ona ita iha esforsu koletivu ne’e.

Ho ajuda husi parseiru oioin sira, iha posibilidade atu foti medida sira ba prevensaun no ba kombate pandemia ne’e to’o oras ne’e iha território nasionál ho rezultadu di’ak ne’ebé hatudu la laiha ema ne’ebé maka mate, maske la hatán ba ita-nia populasaun ninia espetativa tomak.

Kada nasaun hasoru ona ninia dezafiu rasik no iha kazu Timor-Leste nian, bazeia ba meiu sira, rekursus no infraestruturas ne’ebé disponivel iha nasaun ne’e, ita fó ona prioridade no atensaun espesiál ba kontrolu fronteira sira, tanba ne’e orijen prinsipál husi kazu sira ne’ebé infetadu.

Durante besik fulan sanulu ita halo vijilánsia, monitorizasaun, prevensaun no mitigasaun ba kazu importadu sira, ita susesu ona iha ita-nia misaun difisil ida-ne’e.(*)