Tanba númeru kazu Covid-19 dadaun ne’e iha ona tendensia husi transmisaun lokál ba transmisaun komunitáriu.

Daadaun ne’e, iha ona nivel diskusaun oinsá atu halo prevensaun, bainhira mosu tranzmisaun komunitáriu iha territóriu, maibé iha Munisípiu Dili tama ona Transmisaun Komunitáriu.

Ministra Saúde (MS), Odete Maria Freitas Belo hatete, kona-ba transmisaun komunitáriu, parte MS seidauk simu informasaun, maibé dadaun iha ona nivel diskusaun.

Timor-Leste iha tendénsia atu ba duni tranzmisaun komunitáriu, bainhira alerta ona tanba iha planu kontijensia klaru ona.

“Ita nivel de alerta husi tranzmisaun cluster nian ka tranzmisaun lokál ba iha tranzmisaun komunitáriu, iha medidas balun ne'ebé mais rigorozu liután, ne'ebé séi foti bainhira deklara duni katak, ita tama ona iha situasaun ida tranzmisaun komunitáriu nian", dehan Odete hafoin sorumutu ho Primeiru Ministru, Taur Matan Ruak iha rezidénsia Farol, tersa (27/04).

Nune'e, sei deside medida prevensaun nian iha Konsellu Ministru ba tranzmisaun Komunitáriu.

"Agora medida sáida ne'e mak, Konsellu Ministru séi deskute hodi deside hamutuk, medida sáida de'it mak bele aplika durante, bainhira ita tama ona iha tranzminsaun Komunitáriu", Nia informa.

Antes ne’e, Centro Integrado Gestão de Crises-Sala Situação (CIGC-SS) iha loron 25 fulan-abril fó sai katak surtu Covid-19 iha Munisípiu Dili tama ona transmisaun Komunitáriu.

Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, evolusaun surtu Covid-19 iha Munisípiu Díli tuir klasifikasaun Organizasaun Mundial Saúde (OMS) ne’ebé tama ho cluster dadaun ne’e tama ona transmisaun Komunitáriu.

“Evolusaun surtu Covid-19 iha Munisípiu Díli hahú Husi loron 21 fulan-marsu tinan 2020 to’o loron 25 fulan-abril 2021, totál komulativu 1612 no kazu foun iha oras 24 nia laran hamutuk 70, mate na’in-3. Tuir klasifikasaun OMS transmisaun Komunitáriu”, informa Rui liuhusi Zoom Conference, domingu (25/04). (*)