Nune'e, estesaun EE ba da-XIII ne'e sei dekreta husi Prezidente Repúblika (PR), Francisco Guteres "Lú Olo", no envigor iha tuku 00:00 otl, loron segunda (03/05) no remata iha tuku 23:59 otl, tersa (01/06).
Medida ba Ezekusaun Estadu Emerjénsia 12 ne'e sei bazeia ba pedidu Prezidente Republika, tuir konstituisaun haruka.
Prezidente Parlamentu Nasional (PPN),
Aniceto Longuinhos Guteres Lopes, husu ba timoroan hotu, liuliu ba líder polítiku sira atu fó konfiansa ba governu atu ezekuta regra hirak ne’ebé mak prevee ona iha deklarasaun EE ba dala sanuluk-resin-tolu.
“Lei da autorizasaun da renovasaun deklarasaun estadu Emerjénsia XIII pasa. nune'e ha’u apela ba ita-hotu, liuliu ba ami politiku sira, mai ita hamutuk fó konfiansa ba governu atu hasoru no kombate covid-19”, dehan nia iha plenária Parlamentu Nasionál (PN), kuarta (28/04).
Ho ida ne'e, Deputadu Bankada Partidu Demokrátiku (PD), Adriano do Nacimento, ejize Governu atu kriminaliza grupu ka sidadaun ne’ebé hasai informasaun falsu katak covid-19 bosok.
Deputadu ne'e konsidera Kazu covid-19 aumenta iha Timor-Leste, tanba kontribui husi informasaun falsu sira iha mídia sosial.
"Governu tenke penaliza no Krimenaliza grupu sidadaun ne’ebé halo kampaña sistemátiku no organizadu estruturadu, hodi fahe informasaun hoax (falsu) liuhusi facebook, katak covid ne'e bosok”, deklara nia. (*)