Husi karta rezignasaun ne’ebé aprezenta hodi entrega kargu Diretór ba Januario José Varela ne’ebé antes ne’e hanesan xefe redasaun iha mídia refere.
José Belo deside rezigna-an husi kargu Diretór www.tempotimor.com iha loron 30 fulan-abríl tinan 2021.
“Ha’u deklara rezigna-an husi ha'u-nia-kargu nu'udár Diretór www.tempotimor.com hahú husi loron 30 fulan-abríl tinan 2021, no entrega fali kargu refere ba Januario José Varela, ne'ebé antes hanesan xefe redasaun”, deklara José Belo, ba www.tempotimor.com, iha ótel Timor, kuarta (05/05).
Ho deklarasaun ne'e, hahú loron 30 fulan-abríl tinan 2021, parte José Belo entrega totalmente atividade, no jestaun iha www.tempotimor.com ba Diretór foun, atu kontinua jere ba futuru no laiha intereferensia ba servisu.
Maski rezigna-an husi diretór no nia parte la deklara kona-ba motivu, maibé hakarak atu entrega ba jerasaun foun hodi lidera ba futuru.
Aliende ne’e, Januario José Varela, ne’ebé assume kargu hanesan diretór foun hatete, nia parte prontu lidera Tempo Timor ba futuru, maibé presiza nafatin apoiu no kolaborasaun husi parte sira hotu.
“Ha’u prontu lidera, maibé iha ne’e ha’u mós presiza nafatin ita hotu nia apoiu no kolaborasaun servisu hamutuk ho parte sira hotu”, dehan Januario.
Januario Varela ne’ebé antes ne’e assume kargu hanesan xefe Redasaun iha mídia refere entrega filafali kargu ne’e ba jornalista jerasaun foun, Rogerio Perreira Cársere atu sai xefe editor ba futuru.
Dadaun ne’e, Tempo Timor iha Jornalista nasionál no munisípiu hamutuk 11 inklui funsináriu administrasaun na’in-1. (*)