Ba teste swab ne’e, lolos governu buka mekanizmu seluk atubele halo jestaun ba situasaun ida ne'e maibé la'oós uza medida atu hanehan fali povu iha situasaun ida ne'e.

Vise xefe bankada CNRT, Patrocino Fernandes dos Reis haktuir, iha dekretu Prezidente Repúblika kona-bá medida estensaun Estadu Emerjénsia, hatete nafatin asegura no fó asisténsia ba diretu própiu sidadaun ninian iha situasaun covid-19.

"Ha’u hanoin governu nia medida de implementasaun ne'e nia baze mak estensaun da estadu emerjénsia husi Prezidente Repúblika, entaun dekretu PR mak as, labele kontradis fali ho dekretu ida ne'e, hodi halo violasaun no diretu umanu tanba halo ameasa ba ema nia intergridade fízika, hodi halo teste swab”, deklara nia iha PN, sesta (07/05).

Tanba ne’e, medida teste swab ba sidadaun sira bele akontese wainhira governu identifika ona sidadaun ne'e iha kontaktu ruma ho pasiénte covid-19.

"Porzemplu keta governu deteta ona nia halo ona kontaktu ho ema ruma pozitivu, katak iha ona seguransa de jurídiku para governu iha obrigasaun atu halo teste ba ema ida ne'e, tanba se ita laiha ida ne'e, bele lori implikasaun ba ema seluk”, esplika nia.

Ho ida ne'e, bankada CNRT apela nafatin ba governu atu fó asisténsia ba povu, tuir lei no konstituisaun, tanba konsidera situasaun sira ne'e, sadik governu ninia kapasidade atu halo jestaun oinsá rezolve problema sira ne'e ho diak.

Iha fatin hanesan Xefe Bankada UDT, Francisco David Xavier Carlos, deskonfia governu liuhusi Ministériu Saude (MS) hamosu komplikasaun barak iha implementasaun medida.

Tanba, planu teste swab ne'e tuir lolos governu submete ba kada suku sira mak hala'o teste masal, maibé, la'ós ba hatun fali ema iha dalan hodi obriga teste swab. (*)