Maibé, Ministru Prezidénsia Konsellu Ministru (MPKM), Fidelis Leite Magalhăes, deklara governu la presiza fó komentáriu, no orienta jornalista atu husu direta ba Kay Rala Xanana Gusmão.

Tanba dekretu governu ne’ebé deside aplika serka sanitária no konfinamentu obrigatóriu iha kapitál Dili hodi bandu movimentu no halibur ema barak, maibé Xanana Gusmão halibur nafatin komunidade sira, la hetan asaun husi autoridade seguransa.

Haree ba númeru infetadu Covid-19 ne'ebé kontinua sa'e, no Organizasaun Mundiál Saúde (OMS) rasik rekomenda tenke implemena distansiamentu sosiál, maibé parte seluk Xanana Gusmăo kontinua halibur komunidade sira.

Ho ida ne’e, Fidélis hatete jornalista bele konfirma rasik ho Kay Rala Xanana Gusmăo. Tanba governu ko’alia kona-ba polítika no atuasaun governu nian.

“Timor ne'e, ki'ik hela, husi ne'e ba Tasitolu la dook, ne'ebé Ita-boot konfirma diretamente ho señor Kay Rala Xanan Gusmăo, tanba ami la presiza komenta kona-ba ida ne'e”, deklara Fidelis iha Ministériu Finansas Ai-tarak Laran, kuarta (19/05).

Relasiona ho Prezidente Partidu CNRT, Kay Rala Xanana Gusmão, durante fulan ida nia laran halibur komunidade sira iha kapitál Dili liliu iha área Tasitolu hodi supa bee Tasitolu no hadi’a estrada atu fasilita komunidade sira asesu.

Antes ne’e, Polísia Nasional Timor-Leste (PNTL) kaptura no detein sidadaun lubuk ida, tanba viola regra serka sanitária no konfinamentu obrigatóriu hodi halo ezersísiu iha fatin públiku.

Maibé, realidade asaun husi Kay Rala Xanana nian ne'ebé kada loron sempre halibur komunidade sira iha fati-fatin, maibé polísia la halo atuasaun ruma. (*)