Sekretária Meza PN, Lídia Norberta afirma, iha fulan-abril tinan 2021 deputadu PD António da Conseição hato'o ona pedidu verbál ida ba PN atu fiskaliza serbisu membru governu ba asuntu Kombatente no Libertasaun Nasionál iha semana oin, maibé kansela.
Tanbá, deputadu António da Conseição seidauk hato'o rekerimentu eskritu ida ba Prezidente PN Aniceto Guteres.
“Tuir lolos semana oin ne'e ita atu halo diskusaun ho Ministru ba asuntu kombatente no Libertasaun Nasionál, tanba deputadu Antonio da Conseição husi PD halo pedidu atu verbal besik fulan ida ona. No tantu prezidente PN husu para señor deputadu PD ne'e halo pedidu rekerimentu eskritu ida, nune'e mak ita-nia fiskalizasaun sei muda”, esplika Deputada Lídia iha PN, sesta (21/05).
Wainhira atu halo fiskalizasaun ida ba serbisu membru governu sira-nian, PN presiza simu karta rekerimentu husi rekerente sira, atubele koordena ho parte governu.
“Fiskalizasaun ne'e bele halo mós husi figura rejimentál halo iha plenáriu tanba bazeia ba rejimentu iha forma de fiskalizasaun oioin, entaun fiskalizasaun ne'e ita bele liuhosi norma ida perguntas ba governu e dabte ho governu”, dehan nia. (*)
