Tanba ne’e, CNRT husu ba sidadaun hotu atu prepara-an tuir vasinasaun tanba Prezidente Partidu CNRT, Kay Rala Xanana Gusmão iha loron kinta (24/6), deside simu ona vasina sinovac doze dahuluk iha Sentru Saúde Fatumeta.
Deputada bankada CNRT, Maria "Gorumali" Barreto hatete, dadauk Xanana Gusmão ho nia estrutura partidu nomós deputadu 21 CNRT iha PN, ba simu ona vasina sinovac.
"Sim, ba sidadaun sira hotu, ba povu doben Timor-Leste ne’ebé mak seidauk ba simu vasina, agora dadauk bankada CNRT nomós prezidente Partidu CNRT ba simu ona vasina sinovac, ne’ebé mak sente katak hakarak atu ba vasina, bele ba dadauk iha sentru saúde sira iha ita-boot sira-nia fatin ne’ebé mak besik, ba asesu dadauk bele hili AstraZeneca e bele hili Sinovac, maibé sujere di'ak liu hili Sinovac”, dehan nia iha Parlamentu Nasionál, kinta (24/06).
Bankada CNRT mós haree katak, vasinasaun Sinovac di'ak no seguru liu vasina AstraZeneca, ne’ebé governu haruka mai dahuluk.
Tanba ne'e, husi vasina sira ne’ebé distribui mai Timor-Leste ne'e hosi sujestaun bankada CNRT nian atu governu buka vasina.
Maibé Vasina AstraZeneca ne’ebé governu lansa dahuluk iha Munisípiu Dili, bankada CNRT lakoi simu, tanba vasina AstraZeneca ne'e ninia reasaun maka’as. (*)
