“Tanba Bankada CNRT lakohi atu ikus mai Governu de Faktu uza tán razaun varian foun hodi estende Estadu Emerjénsia no aplika serka sanitária no konfinamentu obrigatóriu”, deklara Vise Xefe Bankada CNRT, Patrocino Fernandes dos Reis, iha PN, kuarta (30/06).
Tanba, tinan ida resin ona, Timor-Leste aplika Estadu Emerjénsia ba prevensun Covid-19, ne'ebé fó impaktu ba situasaun ekonomia iha rai laran.
Maske, varian foun Corona Delta ne'e rasik, tama ona iha nasaun Indonézia maibé husu Governu atu taka fronteira aeru, marítima, no terrestre ho nasaun viziñu atu evita varian foun tama iha Timor-Leste.
Aliende ne’e, husu nafatin governu atu tau matan ba pesoál sira iha liña frente liliu Fronteira, tenke fornese fasilidades fatin hela dignu, hahán, subsídiu frontline no ekipamentu protesaun.
Maibé Xefe Bankada FRETILIN, Francisco Miranda Branco, konkorda desizaun governu, tanba dalan úniku atu prevene situasaun covid-19 ho Corona Delta ne'e duni estensaun estadu emerjénsia.
Entretantu Deputada Bankada PLP, Maria Angelina Sarmento hatete, husi sira-nia parte fó apoiu totál ba estadu emerjénsia ne'ebé governu aprezenta ba Parlamentu Nasionál ne'e. (*)