"Ba tinan 2021, ita iha ona konstrusaun ne'ebé mak hari’i iha tinan 2020 liliu ba Covid19 nia iha 44 projetu ne'ebé mak hala'o hela, konstrusaun ne'ebé mak importante ICU ba Covid19 nian, Laboratóriu ba sentru saúde sira nomós iha konstrusaun balun”, dehan Ministra Odete hafoin enkontru ho PM iha Farol, tersa (06/07).

Iha tinan 2021 MS iha konstrusaun sia, hitu ba postu saúde hamutuk ho rezidénsia ba médiku sira nomós konstrusaun iha Maliana ba fatin pediatria nian no fatin baixa nian ba ema adultu no feto sira.

Konstrusaun ba tinan 2022 no tinan 2023 Ministériu Saúde koloka millaun US$8 ba postu saúde sira no rezidénsia ba médiku sira.

"Orsamentu husi konstrusaun hirak ne'e iha tinan 2021 laiha kalkulasaun ne'ebé klaru ba ita-boot sira maibé ba 2022 ba 2023 ita koloka hela miliaun 8 de dolláres Amerikanu ba postu saúde ne'ebé mak ita hakarak hari’i tan nomós rezidénsia balun”, dehan nia.

Maibé iha projetu 9 ne'ebé balun atinje ona pursentu 100 (100%) hanesan Tasitolu, Lahane kompletu ona no hein atu uza.

Iha balun ne'ebé atinje ona pursentu 80 no 90 no hein halo nia rezultadu, maibé iha balun ne'ebé mak foin haree filafali ninia dezeñu ho ninia prosesu konkursu postu saúde no rezidénsia médiku sira. (*)