Maske, Funsionáriu Publiku hirak ne'e konsege tama ona iha kategória idade reforma, maibé Komisaun Funsaun Públiku labele foti desizaun tanba seidauk iha lei.
Vise Prezidente Parlamentu Nasionál (PN), Maria Angelina Sarmento deklara, dadauk Parlamentu Nasionál (PN), simu ona informasaun no dadus kona-ba funsionáriu ho idade reforma hamutuk rihun-lima-resin ne'ebé aprezenta husi Komisaun Funsaun Públika.
Tanba ne'e, iha loron kuarta (07/07), Prezidente Komisaun Funsaun Públika (KFP), Faustino Cardoso marka audensia ho Prezidente Parlmentu Nasionál (PN), Aniceto Guterres hodi ko’alia kona-ba diretu ba reforma, tanba seiduk halo lei.
"Sim, los ami mós ohin (07/07) ko’alia ida ne'e. To'o agora ita seidauk iha lei ida kona-ba idadade ba reforma. Tanba saida lei ne'e iha implikasaun mós orsamentu, se ohin (kuarta) tuir dadus ne’ebé mak KFP hato'o iha mais purvolta de 5 mil ita-nia funsionáriu mak tama ona idade reforma”, dehan nia iha PN, kuarta (07/07).
Maibé, normalmente lei kona-ba idade reforma nian, Komisaun Funsaun Públika (KFP) prepara ona esbosu lei ida ho nune'e mak meza PN husu KFP, bele lori ba PN antes tama debate Orsamentu Jerál Estadu (OJE) tinan 2022.
Durante ne’e, funsionáriu ne’ebé ho idade reforma, seidauk bele reforma tanba laiha lei ida defini kona-ba idade reforma nian, katak idade funsionáriu sira-nia idade presiza to'o hira mak bele hetan reforma.
Bainhira reforma bele implika ba orsamentu tanba tenke asegura kuandu reforma, funsionáriu sira sei simu sira-nia diretu husi seguransa sosiál nian no diretu ba reforma nian. (*)