Tanba deklarasaun Xefe Bankada Kmanek Haburas Unidade Nasionál Timor Oan (KHUNTO), Olinda Guteres iha loron (06/07), hatete maske Eis Prezidente Repúblika Indonézia, Gusdur ho kondisaun Matan Delek, no nia fen (espoza) lori sasoru tuituir mak fó hán nia maibé povu konsege hili nia sai prezidente Indonézia.
Ho deklarasaun ne'e, Portavóz Asosiasaun Halibur Difisiénte Matan iha Timor-Leste (AHDMTL), Natalia Gonzaga dos Santos Moniz husu deputada Olinda atu koalia tenke analiza no buka utiliza liafuan tuir termu no dignu ba ema ho defisiénte sira.
“Amis husi Asosiasaun Halibur Defisiensia Matan Timor-Leste (AHDMTL) kondena maka’as ho distinta deputada Olinda Guteres ne'ebé ko’alia la utiliza lingua tuir termu no dignu ba ema ho defisiénsia”, dehan Natália iha salaun Formasaun FONGTIL, Kaikoli, sesta (09/07).
Nu’udar reprezentante povu iha Parlamentu Nasionál (PN) tenke respeita ema seluk nia diretu no labele hasai deklarasaun hodi ofende ema ho defisiénsia sira.
Tanba termunolojia ne'ebé tuir lolos atu ko’alia ne'e dadauk konsagra ona iha konstituisaun RDTL, artigu 21 ne'ebé mensiona kona-ba sidadaun ho defisiénsia no la'ós sidadaun matan delek. (*)
