Ministru Prezidnesia Konsellu Ministru, Fidelis Leite Magalhães hatete, konsellu Ministru iha loron 14 fulan-jullu asiste ona aprezentasaun kona-ba preparasaun partisipasaun Timor-Leste iha Simeira kona-ba Sistema Ai-hán.

“Simeira ne’e sei realiza hamutuk ho Asembleia Jerál Nasaun Unidas da-76, iha fulan-setembru tuirmai, no sei iha pre-simeira ida durante loron tolu, ne’ebé organiza husi Itália husi loron 26 to’o 28 fulan-jullu tinan 2021, iha sede Organizasaun Nasaun Unidas ba Alimentasaun no Agrikultura (FAO) iha Roma”, informa Ministru Fidelis, iha Palásiu Governu, kuarta (14/07).

Husi Simeira Sistema Aihan atu halo lansamentu, iha kontestu ne’ebé luan Ajenda 2030 Nasaun Unidas ba Dezenvolvimentu Sustentável, asaun brani ne’ebé atu muda mundu nia maneira hodi produz no konsumu hahán, atu garante kapasidade ne’ebé tahan ba tempu naruk hodi fó hahán ba populasaun mundiál ho forma ida ne’ebé sustentável.

Aliende ne’e, KM asiste mós aprezentasaun kona-ba Planu Asaun Nasionál ba Konsolidasaun Seguransa Alimentár no Nutrisaun, ne’ebé pontu fokál sira Scalling Up Nutrition “Sun Movement” nian halo.

Planu ne’e propoin konjuntu ida indikadór, meta no prioridade sira hodi alkansa objetivu boot halakon hamlaha, alkansa seguransa alimentár, hadi’a nutrisaun no promove agrikultura sustentável, hodi garante asesu universál ba aihan ne’ebé seguru no nutritivu nomós halakon forma hothotu malnutrisaun nian.

Entretantu KM Aprova ona autorizasaun ba abertura husi prosedimentu aprovizionamentu konkursu públiku ba akizisaun roo peska industrial rua, ho kapasidade 250 GT kada ró, tuir projetu ne’ebé aprezenta husi Ministru Agrikultura no Peskas, Pedro dos Reis. (*)