“Lori povu Timor-Leste nia naran, Governu hato’o sentida kondolénsia ba família no belun sira husi vítima inundasaun grave nian ne’ebé afeta Alemaña, parte oeste, no Béljika, parte leste, iha kinta (15/07) madrugada”, dehan Ministru Prezidensia Konsellu Ministru, Fidelis Leite Magalhães, iha pájina ofisiál Governu Timor-Leste, segunda (19/07).

Tuir informasuan ne’ebé iha pelumenus ema na’in-103, iha Alemaña, parte oeste, no ema na’in-23, iha Béljika, rejiaun Valônia nian mak mate tanba katástrofe naturál  boot liu  ne’ebé  akontese iha Europa sentrál.

Maibé sei iha ema rihun-ida liu mak lakon iha inundasaun, ne’ebé antes ne’e nunka akontese, ne’ebé afeta liliu Alemaña no Béljika, maibé mós nasaun seluk-seluk tan iha rejiaun ne’e.

Udan ne’ebé boot estraga karreta, uma nomós dalan sira, halo ema barak maka la asesu ba eletrisidade no telekomunikasaun.

Governu Timor-Leste louva serbisu autoridade sira husi nasaun hirak ne’ebé afetadu iha sira-nia serbisu hodi buka no salva ema sira, iha kondisaun sira ne’ebé difísil tebetebes.

“Ami-nia kondolénsias kle’an tebes ami hato’o ba família sira ne’ebé maka lakon sira nia ema ne’ebé sira hadomi no ami hahi’i sira ne’ebé kontinua buka ema sira ne’ebé maka lakon. Iha loron difisil hirak ne’e, Timor-Leste hatudu ninia solidariedade ba Governu no populasaun tomak Alemaña no Béljika nian”, hatete Ministru Fidelis Magalhães. (*)