“Konsellu Ministru ohin (21/07) deside atu propoin dala ida tan extensaun ba Estadu Emerjénsia ba fulan oin mai, fulan-Agostu tomak to'o Setembru”, informa Ministru Prezidénsia Konsellu Ministru, Fidelis Leite Magalhães, iha Palásiu Governu, kuarta (21/07).
Tanba Estadu Emerjénsia ne'e realiza to'o loron tolunulu kuandu Governu halo renovasaun ba Estadu Emerjénsia tenke husi filafali ba Parlamentu Nasionál atu debate.
Antes ne'e Governu simu sujestaun atu extensaun Estadu Emerjénsia ba to'o tinan ida, maibé konstituisaun repúblika la fó dalan.
"Ami mós aproveita atu fó hatene ba sidadaun sira tanba, ami rona barak tanba saida mak EE ne'e la halo tinan ida tomak?. Laiha dalan. Tanba Konstituisaun da Repúblika la fó dalan”, esplika Fidelis.
Tanba haree mantein kauza determinante sira ne'ebe justifika ona deklarasaun estadu Emerjénsia no ninia renovasaun sira no atubele evita no neutraliza risku propagasaun sira husi SARS-CoV-2,
Ho ida ne’e, bele proteje saúde públiku no kapasidade resposta husi Sistema Nasional Saúde, Governu propoin ba Prezidente Republika atu, ho renovasaun estadu Emerjénsia nian, permite suspensaun ka restrisaun ba direitu no garantia fundamentál balun.
Nune'e mós regras sira sei iha mudansa ba Estadu Emerjénsia ne'ebé sei aplika iha fulan-Agustu tuir situasaun atual. (*)