“Halo ona despaixu para kria komisaun tranzisaun nian,” PM Taur hatán jornalista ida ne'ebé husu kona-ba aban, Tersa (30/07/19) nu'udar loron ikus mandatu Mari Alkatiri, nu'udar Prezidente Autoridade RAEOA-ZEEMS.  

PM Taur esplika, prosesu tranzisaun sei iha no ekipa tranzisaun sei ko’alia para halo kontaktu ho RAEOA-ZEEMS atu halo transferia. “Atu hatene uluk, saida mak iha ne'ebá. Oinsá mak halo tranzisaun. Tanba, iha lei mós hatete kariik iha mandatu hotu mak iha vácuotura (vákuu, Tetun) iha sentu vinte dias, segundu homen iha ne'ebá bele sai lider,” PM Taur esplika. 

Promesa Kampaíña  

Iha kampaíña Elisaun Antisipada 2018, isu kona-ba atu hasai Mari Alkatiri husi Oekusi, suli maka'as. Isu ne'e mós sai nu'udar komprimisu polítika Aliansa Mudansa ba Progressu (AMP) nian. 

Iha kampaíña Elisaun Antisipada 2018, ho lian makas portavoz AMP, atuál Primeiru Ministru Taur Matan Ruak promete ba simpatizante AMP iha Oekusi, atu duni sai Alkatiri husi RAEOA.  

“Ha'u hakarak Mari Alkatiri, sai husi Oekusi. Tanba, nia halo terus ona imi,” afirma Taur Matan Ruak iha momentu kampaíña AMP iha Oekusi.

Lá too de’it iha ne’e, iha konferensia imprensa AMP ne'ebé halo iha Sede CNRT, Bairru Dos Grillos, Dili portavoz AMP dala ida tan ho fiar an halo promesa ba públiku katak, iha primeiru Konsellu Ministru VIII Governu, sei debate kona-ba asuntus hasai Alkatiri husi RAEOA-ZEEMS. Taur Matan Ruak iha tempu ne'ebá espera, Mari Alkatiri resigna an uluk molok Governu foti desizaun. 

Maibé, depois de tinan ida liu ona PM ninia lian laek e lakonsege hasai Alkatiri husi ninia kargu to'o mandatu remata iha 31 Jullu 2019.