Tempotimor (Dili)-Prezidente Partidu Asosiasaun Sosial Demokrátika Timorense (ASDT), Francisco da Silva deklara, estrutura no militante Partidu ASDT la kontente ho desizaun Tribunál Rekursu (TR), tanba notifika partidu atu labele kompete eleisaun maibé la halo analiza no verifikasaun.

“Ami la kontente, e povu mós la kontente nafatin ho desizaun ne'ebe tribunál rekursu foti”, hatete nia iha Sede partidu ASDT, Manleuana, segunda (02/08).

Tanba, iha tinan 2017, partidu ASDT simu karta notifikasaun husi Komisaun Nasionál Eleisaun (CNE) ho Sekretariadu Tékniku Administrasaun Eleitorál (STAE) autoriza atu partisipa iha eleisaun jerál tinan 2017.

Nune'e, liuhusi rezultadu kongressu ne'ebé Partidu ASDT hala'o, konsege tun fó pose ba esturura partidu ASDT nian iha baze.

Maibé, simu fali akórdaun husi tribunál rekursu, la autoriza partidu istóriku ne’e atu kompete, tanba rejístu dupla.

“Mais tuir lei hatete dehan, ida ne'ebé mak simu ona notifikasaun ne'e mak bele liu, ida ne'ebé mak la liuhusi kritéria, la simu notifikasaun, nia labele, tanba ne'e mak ami la kontente”, dehan nia. (*)