Programa juramentu Ramelau nu’udar komprimísiu husi KHUNTO, ne’ebé antes ne’e iha periodu kampaña eleisaun liubá kompromete ona ba militante no públiku tomak, katak bainhira partidu KHUNTO hetan kargu iha governu sei lori membru governu sira ba hala’o juramentu iha Nain Feto Ramelau.
Ho komprimisiu polítiku ne'e mak, Membru partidu KHUNTO ne’ebé hola parte iha governasaun daualu no Deputadu na'in-5 husi bankada KHUNTO nian iha Parlamentu Nasionál, iha loron (12/08) konsentra ona iha Munisípiu Ainaro atu prepara a’an ba tuir juramentu.
Membru Governu hirak ne'ebé sei tuir iha juramentu mak, Vise-Primeira Ministra no Ministra Solidariedade Sosiál no Inkluzaun (VPM-MSSI), Armanda Berta dos Santos, Ministru Agrikultura no Peskas, Pedro dos Reis, Ministru Transportes no Komunikasaun, José Agustinho da Silva.
Vise Ministru Interiór, António Armindo, Vise Ministru Obras Públika, Vise Ministru Justisa, José Edmundo Caetano, Vise Ministru Negósius Estranjeirus no Kooperasaun, Julião da Silva, Vise Ministru Agrikultura no Peska, Abílio Xavier de Araújo, Vise Ministru Edukasaun, Juventude no Desportu, António Guterres, Sekretáriu Estadu Formasaun Profisionál no Empregu, Alarico do Rosário, Sekretáriu Estadu Peskas, Elídio de Araújo, Sekretáriu Estadu Terras no Propriedades, Mário Ximenes.
Aleinde membru KHUNTO na'in-lima iha Parlamentu Nasionál, hanesan, Vise Prezidente Parlamentu Nasionál, deputadu Luis Roberto, deputadu Irene Gonzaga Sarmento, António Verdial Sousa, António Maria Nobre Amaral Tilman, no deputada Olinda Guterres.
Antes ne’e, Konselleiru Máximu Partidu KHUNTO, José dos Santos “Naimori”, promete iha loron 14 fulan-Agostu tinan 2021 ne'e sei lori membru Governu sira ba halo juramentu iha Ramelau.
“Iha loron saída?. Iha loron 14 Agostu agora atu lori ba iha Ramelau, monu iha loron Sábadu, ha'u hatete ba maluk sira ha'u mós la barak hatete sai iha ne'e maibé lori imi-nia brani lori imi-nia matenek lori imi-nia serbisu ohin loron fó oportunidade ha'u bele ko'alia sai iha palku”, deklara Naimori iha Sede KHUNTO hafoin realiza aniversáriu ba tinan 10, iha Suku Manleuana Aldeia Laulora, domingu (04/07). (*)
