Tempotimor (Dili)-Portavós Grupu Joventude Munisípiu Baukau (GJMB), Grecia Guterres Gomes deklara, juventude baukau sai vítima ba Partidu Polítiku (ParPol) balun tanba hetan tiha konfiansa husi joven sira, ikus sai fali ai-tonka ba interese privadu hodi asegura mandatu.

Tanba ne’e, deside hodi fó apoiu ba espoza Primeiru Ministru, Isabel da Costa Ferreira atubele kandidata-an ba Prezidente Repúblika (PR) iha eleisaun prezidensial tinan 2022.

"Ami, husi Grupu Juventude Munisípiu Baukau, sai hanesan fini mós ba rai ida ne'e nian, sente no haree ba realidade balun katak maioritaria lideransa balun aproveita ami joven sira no konsidera ami joven sira, sai hanesan ai-tonka hodi satan netik-an, iha tempu balun de'it”, dehan nia iha Restaurante Benifica, kuarta (25/08).

Bazeia ba festa Demokrasia ne'ebé sei realiza iha tinan 2022, kona-bá Eleisaun ba Prezidente Repúblika ba períudu tinan 2022-2027, Joven Munisipiu Baukau, hakarak, husu no apoiu espoza Primeiru Ministru (PM), Isabel da Costa Ferreira, atu faz parte hodi dedika-an ba Prezidente Repúblika.

Kandidatura Prezidente Republika presiza ema ne’ebé idenpendente, no tenke mai husi feto, hodi bele promove igualdade jéneru, no ema ne’ebé pertinente atu asume kargu Xefe estadu mak Isabel da Costa Fereira nu’udar Espoza Primeiru Ministru Taur Matan Ruak ne’ebé dadauk sai hanesan Xefe ba Governu daualu nian.

Razaun prinsipal ne’ebé atrai juventude sira-nia fuan, tanba nia ema ida ne'ebé nakonu ho personalidade, karáter no prátiku, karidade, solidariedade, onestidade no entre sira seluk.

Tanba tempu ona, Timor-Leste presiza Prezidente Repúblika ida ne’ebé iha sentimentu hanesan inan-ida, atu hako'ak nia-oan sira hotu, hodi hatudu katak, ba futuru ne'ebé di'ak tenke pasiénsia, esforsu no honestidade.

Husu ba joven sira iha Munisípiu Baukau no namkari iha fatin-fatin, atu hamutuk ho fuan ida, hodi apoiu ba Kandidatura Isabel da Costa Ferreira ba PR ne’ebé laiha limitasaun. (*)