"Bankada FRETILIN rekomenda ba VIII Governu, karik dekreta konfinamentu obrigatóriu iha kapitál Díli no iha munisípiu sira. Governu presiza prepara kondisaun lojístika ruma molok dekreta medida konfinamentu obrigatóriu", dehan nia iha plenária Parlamentu Nasionál (PN), tersa (24/8).

Maske, intensaun Governu aplika regra konfinamentu iha Munisípiu sira liliu fronteira ho Indonézia atu kombate propagasaun variante foun, maibé Governu presiza halo uluk avizu ba populasaun sira hodi prepara sira-nia an, karik Governu dekreta ona regra refere.

Tanba, agora ne'e populasaun saturadu, baruk kolen ona ho situasaun ida-ne’e. Ho tan polítiku sira, balu ne’ebé politiza moras pandemia mundiál ida-ne’e, tanba sira-nia hanoin, sira-nia pensamentu ‘post power syndrom’.

Xefe Bankada CNRT, Duarte Nunes deklara, nia parte konkorda ho ejizensia ne'ebé hato'o husi Xefe bankada Fretilin iha plenária, kona-bá preokupasaun nesesidade povu nian.

"Agora dehan konfimentu totál, munisípiu hothotu, ba toos mós labele, nia atu hán saida, estadu fó hán ka la'e. Hanesan horisehik (24/08), deputadu Branco ko'alia ne'e, estadu atu deklara fali konfinamentu totál, mais tenke haree mós nesesidade bázika ne'ebé mak populasaun presiza, e ha'u konkorda, nia (Branco) ko'alia loos", dehan nia.

Haree ba lójika ne'e, regra konfinamentu ne'e oho ema tanba bandu ema ba natar no toos, no loroloron uma de'it, entaun ema sai hamlaha to'o mate de'it.

"O haruka nia toba iha uma, nia toba, tanba nia tauk be nia toba hotu, mais nia toba de'it, nia la hán buat ida, o ba fali ne'e mate ona, mate ne'e Covid ka nia hamlaha, problema simples, ita haree buat lójika ne'e hanesan ne'e. Ne'e ita oho ema, ita ko'alia loron manas, ita ka subar buat ida, buat realidade ne'e", afirma nia.

Tanba ne'e, Governu presiza hadi'a kestaun jestaun de'it, no atu halo jestaun di'ak presiza iha osan, iha sistema di'ak.

"Ha'u atu dehan jestaun di'ak halo nusa, jestaun mak hanesan ne'e, buat hotu rungu ranga hanesan ne'e", hatete nia. (*)