Tempotimor (Díli) – Ministru Agrikultur no Peskas (MAP), Joaquim José Gusmão dos Reis Martins optimista, seitor agrikultura Timor-Leste prepara ona hodi prenxe rekezitu adesaun Timor-Leste ba membru ASEAN.
"Ita prepara ba ASEAN, ne'e intensivu tebetebes. Ita mós tau ita nia vokal point husi karantina no pekuaria ne'ebé mak bele servisu diretamenteba iha rekezitu ne'ebé mak ASEAN husu. Tan ne’e, ita preparadu no agora ita hein hela ekipa ida mai husi ASEAN nian,” hatete Joaquim bainhira asiste seremonia loron FALINTIL ba dala 44, Tersa (20/08/19) iha Kuartél Jenerál F-FDTL, Fatuhada, Díli.
Nia dehan, bainhira enkontru ho Ministru Negósiu Estranjeiru no Kooperasaun (MNEK) nia hato'o ona katak MAP preparadu para fó informasaun ba delegasaun ASEAN, ne'ebé iha tempu besik atu mai Timor-Leste.
MAP informa, MAP nia polítika iha VIII Governu atu loke tan natar to'o 50 mil hektares.
Preve Miliaun 17 Ba 2020
Kona-ba orsamentu ba 2020, MAP hatete preve miliaun 17 hodi ezekuta iha tinan ida nia laran.
"Orsamentu MAP nian ba 2020 nian ami deskute hela. Ami hetan pakote pur volta miliaun 13 ba liñas ministeriais, depois aumenta tan miliaun 13 ba subsidiu. Entaun ami iha totál miliaun 17 resin," dehan MAP Joaquim.
Nia afirma, orsamentu 2020 nian kontinua fó prioridade ba seitor agrikultura nomos ba Peskas no pekuaria.
Hatán kona-ba Orsamentu Jerál Estadu (OJE) 2019 ba MAP, Jaoquim dehan ezekuta ona pursentu 58%. "Ha'u nia dadus ikus liu to'o loron 30 Jullu ho komitmentu hotu to'o iha pursentu 58%. Husi atuál komitmentu to'o obligasaun iha 58%. Mas, agora bele sa'e liután," nia esplika.