Terseiru Vise Prezidente Partidu Congresso Nasionál de Reconstrução de Timor (CNRT), Tomas Cabral hatete, CNRT kumpri desizaun husi Prezidente Repúblika, Francisco Guterrres 'Lú Olo' dekreta loron eleisaun no CNRT nu'udar partidu ida prontu atu kompete iha eleisaun prezidensiál.

"Ami na'in-4 husi CNRT ami mai hasoru Prezidente Repúblika, tanba ami hetan konvite ba konsulta, ami hato'o ba prezidente, pozisaun CNRT mak ida de'it, marka loron eleisaun e ami kumpri buat ne'ebé iha no ami mai atu kontribui ba konsulta ne'e", dehan nia hafoin hasoru malu ho PR Lú Olo iha Palasíu Prezidensiál Bairopite, sesta (07/01). 

CNRT nu'udar Pilar polítika partidu nian, Estadu nian, CNRT nia prezensa atu kontribui ba markasaun kalendáriu eleisaun.

Maibé kona-ba kandidatura CNRT iha nia estatutu rasik, sira la bele deside buat ida, tanba konferénsia ka kongresu altu nível partidu nian mak sei deklara hanesan desizaun partidu.

"CNRT partidu polítik ida, ami iha bankada parlamentar, ami prontu atu kompete ka ami prontu atu salva orden konstituisional", reafirma nia.

Enkuantu, Prezidente Interinu Partidu Unidade Dezenvolvimentu Demokratiku (PUDD), Silvestre Sufa hatete, partidu PUDD laiha objesaun ho desizaun Prezidente Repúblika, Francisco Guterrres 'Lú Olo' hodi dekreta loron eleisaun Prezidensiál tuir kompeténsia ne’ebé iha.

“Ami husi PUDD hetan konvite husi Prezidente Repúblika, atu rona informasaun kona-ba preparasaun ba eleisaun prezidensiál, nune’e em prinsipiu PUDD la iha objesaun seluk no sei fó apoiu tomak ba saida mak Prezidente nia hanoin ba eleisaun prezidensiál ne’ebé sei mai", hatete nia.

Entretantu partidu PUDD prontu atu enfrenta eleisaun prezidensiál ne’ebé sei mai no seidauk deside atu iha kandidatu rasik ka apoiu kandidatu seluk, tanba buat hotu sei liuhusi kongresu ka konferénsia partidu. (*)