"Ohin audénsia ho Prezidente PN, ko'alia kona-ba inisiativa sira lejislasaun nian ne'ebé Governu halo haruka tiha ona mai PN e halo balánsu ba tinan kotuk. Iha reuniaun ne'e, prezidente parlamentu nasionál espresa ninia apresiasaun ba servisu hotu ne'ebé mak prezidénsia de Konsellu Ministru halo iha tinan 2021", dehan Ministru Prezidensia Konsellu Ministru, Fidelis Leite Magalães hafoin hasoru malu ho Prezidente PN, Aniceto Longuinos Guterres Lopes, iha PN, kinta (13/01).

Tanba parte Governu ativu no efisiènte tebes, hodi produz no kria lejislasaun balun no dudu inisiativa lubun ida ba Parlamentu Nasionál, nomós ba Prezidente Repúblika.

"Ne'e seidauk konta ho insiativa balun ne'ebé mak halo iha ámbitu servisu Governu nia laran rasik", dehan nia.

Dadauk totál inisiativa ne'ebé mak Ministru Prezidénsia Konsellu Ministru halo no trata hanesan proposta lei, dekretu lei, no rezolusaun, dekretu Governu, ne'e hamutuk 300-resin.

"Iha inisiativa ne'e, so oitaun de'it mak tránzita mai iha 2022. Agora parte Governu nian sei prepara planu lejislativu ne'ebé mak iha tempu badak sei haruka mai iha Parlamentu Nasionál, para bele hatama iha kalendáriu lejislativu ba tinan 2022", esplika nia.

Tanba ne'e, lori konsellu Ministru kompromete atu halo servisu ne'ebé di’ak liután, nomós aktu inisiativa ne'ebé barak bele konklui ho velosidade ne'ebé di'ak no as liu iha tinan 2022.

Iha ne'e, Governu mós simu proposta kalendáriu lejislativu husi Prezidente PN, atu haree kona-ba planu ba trimestre sira atu diskute proposta lei sira ne'ebé mak presiza mós hetan prezensa husi membru Governu.

"Dahuluk nian parlamentu nanoin atu halo saida, no inisiativa hirak ne'ebé mak husi parlamentu presiza Governu ninia apoiu atubele konretiza iha tempu fulan tolu dahuluk no fulan tolu tuir mai, to'o tinan 2022 ne'e remata", hatete nia. (*)