"Sira konvida ha'u atu loke Konferénsia atu ko'alia, tema mak apoiu maun Xanana no ha'u iha ne'e tanba ida ne'e duni. Tanba iha tinan 5, tinan 10 mai ne'e, ha'u fiar ke di'ak liu rai ida ne'e, entrega lideransa rai ida ne'e ba Maun Xanana, tanba dezafiu barak los", deklara Horta iha abertura apoiu MAQURA-X, Iha salaun Dom Bosko Komoro, sábadu (15/01).
Haree ba dezafiu situasaun interna, ekonomia, dezafiu ba governasaun, retifikasaun problema ne'ebé akontese iha parlamentu ho prezidente repúblika, dezafiu boot kona-ba tasi mane, kadora, grites sunrise mai Timor-Leste no adezaun Timor-Leste ba asean.
Sekretáriu Jerál Interinu partidu CNRT, Jacinto Rigoberto hatete, nu'udar partidu boot ho lideransa karismatiku Kay Rala Xanana Gusmão, sente laran metin tebtebes, ho prezensa movimentu barbarak ne'ebé deklara ho sira-nia vontade rasik hodi apoiu Xanana ho nia partidu CNRT.
"Ohin iha ita-nia leet movimentu MAQURA-X, ne'ebé mak rejistu ona iha Partidu CNRT e partidu CNRT akompaña MAQURA-X ninia atividade no organizasaun ida boot no ami hatene maito bem katak MOQURA-X nia determinasaun tebtebes atu apoiu ba maun boot ho partidu CNRT", hatete nia.
Ho ida ne'e hodi partidu nia naran apresia no agradese ba inisiativa kuadru lideransa hothotu ne'ebé mak ho sira-nia inisiativa rasik hodi hari’i movemimentu, hodi fó apoiu ba maun boot ho partidu CNRT.
"Ida ne'e hatudu katak, sidadaun hotu, polulasaun hotu, maioria preokupa ba situasaun rai laran ne'ebé hasoru hela dezafiu no obstaklu boot, sira lakoi povu no rai doben ida ne'e atu terus iha sofrementu nia laran to'o tempu naruk", esplika nia.
Tan ida ne'e momentu oportunu ona atu tama ba festa demokrásia, kada individu kada grupu deside sira-nia an atu haree figura no partidu ida ne'ebé mak bele garantia lori hikas Paz, estabilidade, hadi’a ekonomia rai laran ninian.
"Sira haree katak CNRT úniku partidu bele solusiona situasaun sira ne'e, hanesan uluk CNRT solusiona tiha ona iha 1999, iha 2006-2007 e agora CNRT mak partidu alternativa ne'ebé mak bele solusiona situasaun difísil ida ne'e hodi restaura hikas ita-nia soberania Estadu ida ne'e", afirma nia. (*)
