Prezidente Movimentu MORAKX-KXG Munisípiu Baukau, Sirilio Sirigia hatete, Kayrala Xanana Gusmão nu’undar funu nain FALINTIL nian iha ai-laran, tanba ne'e nia parte sei esforsu ho estrutura Munisípiu hodi halibur ema sira husi rezisténsia atu apoiu votus.

"Ami simu tiha ona tomada pose la'os atu tuur nonok, maibé ami agora ne'e atu esforsu aan para la'o iha Suku sira to'o Aldeia para ita nia Aman Kay Rala Xanana Gusmão iha 2023 ukun rai ida ne'e hadi’a nasaun,"dehan sirilio iha Uailili, domingu (23/01).

Tanba ne'e, sei la'o husi Munisípiu to'o Postu, Postu ba Suku no Aldeia sira iha Munisípiu Baukau laran la'os atu ko'alia polítika partidu nian, maibé halo sosializasaun kona-ba lalaok movimentu rezisténsia nian ba luta nain sira.

"Iha estrutura Munisípiu ami hamutuk na'in-4, ami sei aumenta tán to'o iha Suku no Aldeia garante sei manan iha tinan 2023," nia afirma

Nune'e, Segundu Vise Movimentu Rezisténsia, Migúel da Costa husu estrutura Munisípiu atu respeita lideransa hotu-hotu husi Frente Diplomatika, Frente Armada inklui Frente Klandestina.

"Tolu ne'e mak hanaran rezisténsia, tanba ne'e presiza tau aas dignidade rezisténsia hodi dignifika ita nia leder sira hotu," nia hameno. (*)