“Ita husu, ita apela para ita mantein espíritu, ida ne'ebé mak halo ita nafatin iha situasaun ida ne'ebé mak kalma hakmatek, e husik ita-nia polítiku sira halo sira-nia polítika, e ita ida-idak buka asegura estabilidade seguransa para hakmatek, ita halo ita ida-idak nia servisu ne'e mak importante”, dehan Brigadeiru Jenerál, João Miranda ba jornalista iha Palásiu Governu, tersa (25/01) .
Tanba Timor-Leste nasaun ida ne'ebé mak aplika sistema demokrasia nune'e sidadaun hotu hotu iha direitu atu espressa tuir nia hakarak iha eleisaun prezidensiál.
Nune'e mós fó livre ba sidadaun hotu atu, hakarak hili partidu ida ne'ebé mak nia simpatia hodi ezerse nia direitu iha Timor-Leste.
“Ita bele dehan katak, ita moris ho sistema demokrátiku, ema hothotu iha direitu atu hakarak halo saida de'it, no ba ne'ebé ema iha direitu demokrátiku ha'u la mete”, afirma nia.
Komadante Jerál Polisia Nasionál Timor Leste (PNTL), Komisáriu Faustino da Costa deklara, Institutuisaun PNTL garantia seguransa ba kampaña nasionál hodi hakat ba eleisaun tinan 2022 ne'e sei la'ó ho di'ak
“PNTL ne'e Institutuisaun Estadu, ne'ebé qualquer atividade ita sempre asegura, tanba servisu rutina Polísia nia mak, atu garante katak eleisaun iha tinan ne'e la'ó di'ak, no seguransa ba kampaña nasionál mós la'o di'ak e klaru Polísia Nasionál Timor-Leste servisu ba ida ne'e”, dehan Komisáriu Faustino.
Nu'udar PNTL nia obrigasaun mak menbru sira iha kraik, hala'o servisu tuir lei, orden no tuir Konstitusaun PNTL nia.
“Ami sira komadante iha leten ne'e ami-nia obrigasaun mak ne'e, haree saida mak nesesita ba sira para hala'o sira-nia servisu atu sai di'ak liután”, hatete nia.
Aleinde ne'e kona ba viatura PNTL nia ne'ebé avaria, iha Orsamentu Jerál Estadu (OJE) 2022 aprovadu ona tanba ne'e ba tinan ne'e sei sosa transporte kuaze 90-resin.
“OJE aprova ona, nune'e ba tinan ne'e, ami kompras transporte ne’e kuaze lubuk Ida, tinan ne’e kompara ho tinan sira seluk, tinan ne'e barak liu, ami sei halo kompras ba karreta operasionál ne'e 90-resin, espera katak depois de ezekusaun Orsamentu ne'e bele inisia ona prosesu atu nune'e bele utiliza”, dehan nia. (*)
