“Oras ne’e daudauk ami seidauk haree sira insulta malu karik iha maibé lei iha, se insulta malu mós ami iha pozisaun atu fó hatene dehan ida ne’e labele, e ami kompriende katak kandidatu ne'e timoroan hotu ita-nia maun, alin ita-nia feton, ita fó hatene di'ak liu la'o tuir dalan, atu nune'e povu bele respeita ita, povu sei hili ho dignu,” dehan Prezidente CNE, José Belo hafoin hasoru malu ho PR Lú Olo iha Palásiu Prezidensiál Bairopite, segunda (21/02).
Antes me'e, Komisaun Nasionál ba Eleisaun sira (CNE) bandu kandidatura ba Prezidente Repúblika (PR) labele insulta malu no trata malu iha baze durante tempu kampaña eleitorál, maibé hato’o de'it planu ho programa inklui vizaun ho misaun bainhira kaer ukun.
“Ami sei ko'alia ho kandidatu Prezidente Repúblika sira bainhira kampaña bandu kandidatu sira atu insulta no ataka malu ho liafuan la edukativu iha palku, polítika sira tenke ko'alia de'it programa no vizaun ho misaun bainhira hetan fiar husi povu hodi kaer ukun”, dehan Vise Prezidente CNE, Domingos Barreto, hafoin partisipa atividade Workshop iha Salaum Maubara Room Timor Plaza, kuarta (16/02).
Bainhira ko’alia tiha ho kandidatura sira mak iha tempu kampaña akontese insulta malu, CNE sei halo karta xamada ba kandidatura hodi evita trata malu, maibé kadidatu la kumpri kontinua komete insulta malu ida ne’e krime eleitorál ona no sei prosesu.
“Bainhira kampaña mak akontese kandidatu sira insulta malu ami sei halo karta xamada ba kandidatu atu evita, maibé iha loron tuir mai la rona kontinua akontese trata malu iha kampaña ne’e krime eleitorál desobedénsia”, dehan nia.
Alende ne’e CNE mós husu ba kandidatu partidu Polítiku sira iha tempu kampaña bandu mós labele uza Arte Marsiál atu halo kampaña eleitorál ida ne’e lei proividu, kuandu akontese hela PNTL tenke halo atuasaun. (*)