Sekretariu Jeral Fretilin Mari Alkatiri iha Konferénsia Nasionál Fretilin ba datoluk hato'o kestaun kona-ba AMP ne'ebé laiha sentidu estadu relasiona ho aktu Parlamentu Nasionál hodi kansela viajen Prezidente Repúblika Francisco Guterres Lu Olo.
"PN Vota kontra viajen PR tanba falta sentidu estadu," dehan Alkatiri iha loron ikus Konferensia Fretilin iha salaun City 8,Kanosa Haas Laran, Domingu (22/09).
Kona-ba vizita PR Lu Olo nian, Alkatiri dehan so Xefe Estadu mak bele reprezenta estadu nivel as iha rai li'ur.
"See mak bele reprezenta estadu nivél aas liu iha (rai) li'ur mak XefeEstadu, ne'e reprezentasaun externa ida ne'ebé aas liu. Governu mósreprezenta, maibé reprezentasaun externu ida ne'ebé aas liu makPrezidente Repúblika," dehan Alkatiri.
Nia hatutan, labele impede viajen PR ba rai li'ur tan de'it problema iha rai laran. Tanba bainhira impede, TL izola an.
"Timor Leste hanesan rai kiik diplomásia tenke ativa ho nasaunhotu," nia hatete. .
Maske nune'e, Alkatiri afirma, Partidu Fretilin ne'ebé nia lidera sei la provoka eleisaun antisipada.
"Eleisaun antisipada so sira ho sira mak haan malu iha laran karik, la intende malu, governu la funsiona, maibé konflitu instituisionál labele kontinua hanesan ne'e, Parlamentu sempre vota kontra vizita Prezidente Repúblika nian ba liur. Mas Fretilin sei la uza nia influensia par atu provoka eleisaun antisipada," deklara Sekjer Fretilin ne'e.
Parte balun dehan FRETILIN bele manan elisaun maibe sempre lakon iha ninia ukun.
"Ha'u hare se partidu FRETILIN ne'e bo'ot no nungka lakon maibe lideransa maka la iha kapasidade atu halo negosisaun ho lider seluk hodi kaer ukun," dehan Domingos S. Da Costa, estudante husi fakuldades siencia politika iha Universitariu ida Dili (25/09).
Maske iha problema maibe Domingos promete kedan katak, "ha'u nia aman ho inan mos FRETILIN e ami hotu sei la muda ami nia kartaun ba partidu se se de'it tan ba ami hakarak FRETILIN maka tenke ukun fali rai ne'e."
