Komadante Komandu PNTL Munisípiu Baukau, Superintendente António De Sá, hatete, asina paktu seguránsa ne'e, atu asegura prosesu tomak husi loron 02 fulan-marsu tinan 2022 iha atividade kampañia eleisaun Prezidensiál to'o loron 19 fulan-marsu tinan 2022 rezultadu votasaun.
"Ita halo akordu ida asina paktu kona-ba seguránsa, husi rezultadu enkontru paktu seguránsa ne'e mak sai hanesan baze legál ida para tuun esplika ba ita nia komunidade sira katak iha nivél entre autoridade seguránsa konsellu veteranu ho CNE halo ona enkontru asina paktu seguránsa ho ita nia kandidatu 16 liu liu sira ne'ebé eziste iha Baukau," dehan nia, iha salaun enkontru PNTL Baukau, sesta (25/02).
Nune’e, ékipa susesu mós hato'o hanoin oinsá haforte nafatin ékipa iha Munisípiu laran durante prosesu kampañia to'o rezultadu votasaun.
"Ohin hasai solusaun rua, ida ita ko'alia kona-ba oinsá kestaun kontrola sinpatizantes sira, ho masa husi kandidatu ida-ida internalmente sira nian, ida fali kordenasaun kolaborasaun mai parte externa nian liga ba konteudu husi enkontru ne'e, liu liu oinsá ita sosializa siensebeliza ba ita nia komunidade, sinpatizantes sira objetivu enkontru paktu seguránsa ne'e para sira iha koiñesementu hodi prevene evita buat ne'ebé la espera sinpatizantes sira halo," nia afirma
Tanba ne'e, hahú husi loron 26 fulan-fevereiru tinan 2022 ékipa konjuntu kompostu husi ékipa susesu kandidatu 16, konsellu veteranu Munisípiu, Komisaun Nasionál Eleisaun (CNE-sigla portugues) Autoridade Lokál, lia-na'in sei tuun ba tereñu halo sosializasaun ba komunidade no sinpatizantes sira konteudu husi paktu seguránsa.
Tanba ne’e, sosializasaun sei realiza iha área ne'ebé identifika risku ba konflitu atu bele komprende hodi kontinua kontribui paz no estabilidade iha nasaun laran, liu liu iha Munisípiu Baukau.
Bazeia ba akordu husi paktu seguránsa kada kandidatu simu ho pozitivu, tanba kandidatu na'in-16, nune'e sosializasaun ne'e atu regula membru sira la'o tuir koridór ne'ebé estabelese ona.
"Paktu seguránsa ne'e iha pontu lima, sei fó sai nune'e ita nia povu ein jerál bele mós akompañia, pontu sei hadi'a hela, loos ona ita fó sai ofisiálmente," nia akresenta
Tuir planu emidiatamente kandidatu sira aseita, sei asina paktu seguránsa iha loron 26 fulan-fevereiru tinan-2022.
Entertantu partisipa iha enkontru asina paktu seguránsa mai husi ékipa susesu kandidatu na'in-6 ne'ebé destaka iha Munisípiu Baukau.(*)