Xefe Suku Makalaku, Julio Marques Belo informa, akontese ne'e iha tuku lima loraik mak foin akontese Inséndiu ne'e, maibé la konsege salva dikumentu iha uma laran.
“Sim ahi han tiha, horseik iha ami sai tuku lima loraik, ami sai taka tiha odamatan ami iha tiha dalan mak ami rona katak ahi han tiha sede tiha uma, no ami fila mai uma monu tun tiha ona, no dokumentu suku nia ahi han hotu tiha kedas no ami nunka salva ida”, dehan Xefe Suku, Makalaku ba www.tempotimor.com liuhusi telefone, tersa (22/03).
Dadaun ne'e Sede Suku Makalaku hala'o hela reabilitasaun suku, nune'e dokumentu suku rai iha uma tuan Administrasaun nune'e iha akontese Inséndiu ne'e iha segunda (21/03).
Akontese Inséndiu ne'e tanba deskonfia, sirkuitu eletriku iha uma laran nune'e ikus mai ahi han dokumentu suku nian la konsege salva.
Nune’e ekipa suku, dadaun ne'e prepara ona proposta hodi haruka ba administrasaun estatál Munisípiu Baukau nian.
“Agora mak ami foin kria proposta ne'e, agora mak atu lori ba print hodi entrega ba Prezidente Autoridade Munisípiu Baukau nian”, afirma nia.
Tanba sede administrasaun suku Makalaku nian ne'e patrimóniu Estadu ne'ebé Governu rasik mak sei apoiu hodi hari’i fali sede administrasaun ne'ebé mak ahi han. (*)
