Tuir informasaun katak, joven sira hakilar, tanba la satisfaz ho José Bernardo, ne’ebé antes ne’e mate iha sela detensaun komandu munisípiu Dili.
Akontesementu, rezulta membru servisu sekreta PNTL ho naran MB, hetan kanek iha parte kotuk laran enkuantu membru F-FDTL ho naran CSJ (Kawai), hetan kanek iha parte hasan los, tanba grupu joven sira utiliza fatuk maka tuda.
Tuir informasaun membru servisu sekreta Forsa Polisia hamutuk kareta rua ba apoia Tranzitu Dili, maibé bainhira ekipa to’o iha fatin refere derepente hetan reazen hosi grupu joven sira iha área Audian Blok III (Estadium Dili), hodi kontinua lansa kedas fatuk mai iha grupu apoiu hodi rezulta kanek Kaman.
Hafoin akontesementu ekipa konjunta Forsa Polisia junta ho BOP (Batallaun Ordem Publika) buka tuir kedas suspeitu sira no konsege asegura joven ida ho naran inisial HP, tinan 25, hela iha Audian, Suku Santa Cruz, Postu Administrativu Nain-Feto, ne’ebe hamutuk ho autor prinsipal ba akontesementu refere. Alende ne’e ekipa konjunta bolu mos sasin sira hodi fo deklasaun iha Eskuadra PNTL Vera-Cruz, relasiona ho akontesementu ne’e.
Daudaun membru servisu sekreta na’in rua ne’e hala’o hela tratamentu saúde iha sentru saude Vera-Cruz. (*)