Nune’e, bainhira adeptus balun uza motór kanu-resin membru PNTL sei prende, tanba kontra lei kódigu estrada ne’ebé implementa hela iha Timir-Leste.
“Adeptus sira iha direitu atu espresa ninia sentimentu ou divertimentu, tanba laiha lei ida mak bandu, maibé apelu ba sidadaun ka komunidade sira hela iha Dili, liu-liu joven sira ne’ebé fans ba kopa mundiál iha 2022, labele koko viola fali lei ne’ebé implementa, liu-liu kódigu estrada”, dehan Komandante Tránzitu Munisípiu Díli, Inspetor Polísia Domingos Gama, iha kna’ar fatin Komandu Munisípiu Dili, Kuarta (30/11).
Tanba, dala barak liu adeptu sira kontra lei kódigu estrada, bainhira halo paway uza motor kanu-resin, la uza kapassete no dokumentu motor mós la lori.
“Bainhira nasaun ne’ebé sira fans manán, kadaves sira halo paway, bele hamosu engarafamentu no halo barullu iha Dili, tanba adeptu sira ne’e, uza fali transporte kanu-resin, liu-liu ba motorizada sira, kadaves sei kalan hela mak kanu-resin sira halo barullu kada bairru, sira ne’ebé sei deskansa senti la hakmatek, tanba ne’e, ami hala’o lei kódigu estrada”, dehan nia.
Nune’e, apelu ba joven sira ne’ebé sai adeptu iha kopa mundiál, atu uza tempu no oportunidade ho didiak hodi labele hetan infrasaun ka selu multa.
Tanba, bazeia ba adeptus sira ne’ebé halo paway iha loron 28 fulan-novembru, PNTL konsege prende motorizada hamutuk 35 inklui dokumentu balun.
“Molok iha 28 Novembru Portugál ho Uruguai joga, adeptu sira la’o ho motor kanu-resin no balun la uza kapassete, tanba ne’e ita halo operasaun to’o tuku 12:30, konsege prende motorizada hamutuk 19, kareta-ida ho dokumentu rua, mai fali loron (29/11) depois joga Kopa Mundiál ita halo fali operasaun, prende motorizada kanu-resin hamutuk 9, la uza kapassete 6 no la lori dokumentu-ida”, nia afirma.
Pasa revista ka Chek point ne’ebé PNTL halo iha loron (28/11) la konsege prende motorizada kanu-resin, tanba sira para subar, maibé iha loron (29/11) konsege prende bainhira jogu entre nasaun Portugál ho Uruguai. (*)