Komadante Komandu PNTL Baukau, Superintendente, António De Sa, esplika, Komandu Jerál PNTL liuhusi seksaun pesoál no formasaun ne'ebé kombinasaun ho forsa unidade espesial, fó treinamentu ba membru sira iha nivél Komandu Munisípal, hodi prepara aan antes, molok fó seguransa ba eventu eleisaun parlamentá ne'ebé sei mai.
"Ohin ita hahú abertura ba treinamentu kona-ba ordem públika iha Baukau, treinamentu ne'e atu atualiza kapasidade membru sira nian para evita ba situasaun sira iha eleisaun parlamentár ba situasaun públika sira", dehan nia iha kna'ar fatin vila nova, Segunda (06/03).
Enkuantu treinamentu ne'e liga-ba situasaun reál ne'ebé akontese iha Timor, kuaze tempu kampaña sempre mosu dezentedimentu milatante sira husi partidu polítiku nian, hanesan iha kampaña eleisaun prezidensiál militante sira atake malu, iha área vila antiga Baukau.
Nune'e Komandu Jerál PNTL lansa treinamentu ba membru sira iha nivél Munisípiu hodi prepara hein eventu eleisaun.
"Treinamentu ne'e iha 2, ida teória ida prátika liga liuba ordem públika kontrola masa nian ne'ebé sei hanorin ita nia membru sira metódu tatíka prátika iha tereñu", nia akresenta
Entretantu treinamentu ne'e durante loron 5, ne'ebé partisipa masimu husi membru sira iha Komandu PNTL Baukau. (*)