Nia hatutan, alende patrimóniu estadu, polisia tranzitu mós prende patrimóniu rpvadu lubuk ida ne’ebé komete infrasaun.
"Ami konsege prende kareta estadu rua ne'ebé la hetan autorizasaun husi sira-nia diresaun, kareta privadu ida, tanba na'in lanu, motorizada hamutuk 49 ne'ebé kompostu husi motorizada estadu nian hamutuk 19 no privadu 30, inklui dokumentu lubuk ida," João Belo hateten ba jornalista iha nia knaar fatin Kaikoli, Dili, Kuarta (4/11).
Operasaun ne’e polisia tránzitu halo bazeia ba alerta husi Polísia Nasionál Timor-Leste (PNTL), Komisaun Funsaun Públika (KFP) no Komisaun Anti Korupsaun (KAK), katak labele utiliza partimóniu estadu iha tempu finadu.
"Orientasaun husi komandu no servisu konjuntu husi ministériu relevante mak halo ami hodi halo pasa revista ba transporte privadu no estadu ne'ebé halo movimentu durante tempu finadu iha sidade Dili," Superintendente Polísia João Belo hateten.
Nia dehan, transporte privadu no estadu ne'ebé polisia prende ona sei halo verifikasaun, depois aplika multa iha banku mak bele entrega fali ba na'in.
"Ba kareta no motorizada estadu nian, ami komunika ona ho KAK atu halo verifikasaun, entaun sei prosesu hotu iha KAK, sei entrega fali kareta no motor sira ne'e ba motorista sira, parte PNTL simu lai karta mak fó fali," nia dehan.
Entretantu liña ministeriál ne'ebé servisu hamutuk ba asuntu ne'e mak hanesan KAK, Ministériu Finansas (MF) no Ministériu Transporte no Komunikasaun (MTK).