Tuir Segundu komandante PNTL Munisípiu Dili Superentendente Euclides Belo katak, PNTL kaptura sidadaun ne'e iha nia rezidénsia bairru-pite, Dili.

"Komandu PNTL Munisípiu Dili mós hare katak kada vez iha tempu kalan fugetes tarutu, entaun PNTL halo operasaun koordenadamente ho membru Konsellu Polisiamentu Komunitáriu (KPK) no autoriedade lokál sira inklui kolega balun husi forsa ne'ebé sempre fó informasaun ba autoriedade Polísia. Entaun, ita konsege detekta no kaptura suspeitu ida ho inisiál MA ne'ebé faan fugetes ilegalmente," segundu komandante Euclides hateten lia hirak ne’e iha nia knaar fatin Kaikoli, Kuarta (2/12).

Komandante ne'e afirma, suspeitu ne'ebé PNTL kaptura ne'e iha ona sela detensaun hodi kumpri 72 oras, depois mak submete ba primeiru interogatóriu iha tribunál.

Komandante ne'e mós husu ba komunidade ne'ebé interesadu atu faan fugetes, tenke liuhusi dalan legál.

"Faan fugetes tenke liuhusi prosesamentu legál, kompañia ka individu mak faan tenke legál, maibé laiha legál mak komandu sei la tolera faan fugetes ilegál, tanba fugetes fó perigu ba ema nia vida no bele mós hamosu inséndiu," Euclides informa.

Entretantu suspeitu MA ne'e PNTL kaptura iha aldeia Rai Na'in, suku Bairru-pite postu administrativu Dom Aleixo munisipiu Dili, Tersa dader.(*)